کەشناسی هەرێمی کوردستان پێشبینی دەکات شەپۆلێکی باران هەرێمی کوردستان بگرێتەوە و لە سلێمانی و هەڵەبجەش دەبێت بە شڵێوە.
ئەمشەو بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، پێشبینى دەکرێت سبەىنێ شەممە، شەپۆلێکى کورتخایەنى بارانبارین لە کاتەکانى بەرەبەیان لە باکوورى ڕۆژئاواى هەرێمی کوردستانەوە بەرەو بەشێک لە ناوچەکانى دەشتى هەولێر و کەرکووک و خورماتوو و بەشێک لە ناوچەکانى گەرمیان بێت.
ڕوونیشیکردەوە کە شەپۆلەکە لە کاتەکانى ئێوارەدا ناوچەکانى سلێمانى و هەڵەبجەش دەگرێتەوە و ئەگەر هەیە لە هەندێ ناوچە شڵێوە (تێکەڵەی بەفر و باران بێت) بە تایبەت شارى سلێمانى و بەشێک لە ناوچە شاخاوییەکانى باکوورى ڕۆژهەڵاتى هەرێم.
لە دوێنێشەوە شەپۆلێکی بەفر و باران زۆربەی ناوچەکانی هەرێمی کوردستانی گرتووەتەوە.
