رووسیا ئامادەیی بۆ بەردەوامبوون و کارکردنی زیاتری کۆمپانیاکانی وڵاتەکەیان لە هەرێمی کوردستان و عێراق دەردەبڕێت.
قوباد تاڵەبانی، جێگری سەرۆک وەزیرانی هەرێمی کوردستان ڕایگەیاند، لەگەڵ میخائیل بۆگدانۆف، نوێنەری تایبەتی سەرۆکی رووسیا و جێگری وەزیری دەرەوەی ئەو وڵاتە گفتوگۆمان کرد لەبارەی دوخی ئەمنی ناوچەکە.
وتیشی: “جەختمان کردەوە لەسەر پێویستیی هەماهەنگی و پێکەوەکارکردنی هەموو لایەنە پەیوەندیدارەکان بۆ رێگریکردن لە زیندووبونەوەی رێکخراو و گروپە تیرۆریستییەکان لە عێراق و سووریا”.
ڕاشیگەیاند. “هاوڕابووین کە دەبێت کورد و هەموو پێکهاتەکان بەشداربن لە بونیادنانی سیستمی سیاسیی نوێی سووریادا و لە دەستووری نوێدا ماف و ئازادییە سیاسی و کۆمەڵایەتی و کلتورییەکانی هەموو پێکهاتەکان گەرەنتی بکرێت”.
بە پێی ڕاگەیەندراوەکەی قوباد تاڵەبانی هەردوولا گفتوگۆیان کرد “لەسەر چۆنییەتی پەرەپێدان بە وەبەرهێنانی کۆمپانیاکانی رووسیا لە هەرێم لە بوارە جیاوازەکاندا، شاندی رووسیا ئامادەیی خۆیان دەربڕی بۆ بەردەوامبوون و کارکردنی زیاتری کۆمپانیاکانی وڵاتەکەیان لە هەرێم و عێراق”.
