لە دیداری سەرۆکی یەکیتی و نوێنەری سەرۆکی رووسیادا جەخت لە پاراستنی مافی کورد و ڕۆژئاوای کوردستان لە سووریا کرایەوە.
ئەمشەو بافڵ تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە هەولێر پێشوازی لە وەفدێکی باڵای رووسیا بە سەرۆکایەتیی میخائیل بۆگدانۆف، نوێنەری تایبەتی سەرۆکی رووسیا بۆ کاروباری رۆژهەڵاتی ناوەڕاست و ئەفریقا و جێگری وەزیری دەرەوەی ئەو وڵاتە کرد.
لە دیدارێکدا پەرەپێدانی پەیوەندییەکان لە نێوان هەردوولا لەسەر هەموو ئاستەکان دووپات کرایەوە لە چوارچێوەی پاراستنی بەرژەوەندییە باڵاکان.
هەر لە دیدارەکەدا بافڵ تاڵەبانی پەرۆشی یەکێتی دووپاتکردەوە بۆ فراوانکردنی ئاسۆی هاریکارییەکان و هەماهەنگییەکان لەپێناو خزمەتکردن بە ئامانجە باڵا و هاوبەشەکان و رایگەیاند؛ یەکێتی لەگەڵ هەموو دۆستایەتی و کارکردنێکی پێکەوەییە کە خزمەت بە وڵاتەکەمان و سەقامگیری لە ناوچەکەدا بکات بۆ ئەوەش ئەو پەیوەندییەی سەرۆک مام جەلال بنیادیناوە دەمانەوێت لەهەموو رووەکانەوە گەشەی پێبدەین و بیخەینە خزمەت زیاتر بەهێزترکردنی هەرێمەکەمان.
هەر لە کۆبوونەوەکەدا پێشهاتە سیاسی و سەربازییەکان لەسەر ئاستی رۆژهەڵاتی ناوەڕاست و عێراق بەتایبەت سووریا تاوتوێکرا و دووپات لەپاراستنی ئاسایش و ئارامی لە ناوچەکە کرایەوە بە شێوەیەک لە رێگای دیالۆگ کێشەکان چارەسەر بکرێن و میکانیزمی نیشتمانی بگیرێتە بەر بۆ زاڵبوون بەسەر ئاڵنگارییەکان و پاراستنی مافی هەموولایەک بە تایبەت لە سووریا و رۆژئاوای کوردستان رێز لە ئیرادە و مافی هەموو نەتەوە و پێکهاتەکان بگیرێت و مافەکانی کورد بپارێزرێت و بەشێکی گرنگ بێت لە بنیادنانەوەی سووریای نوێدا.
سەرۆکی یەکێتی بۆ کۆی گۆڕانکاری و پرسەکان ستراتیژی یەکێتی خستەڕوو و رایگەیاند؛ ویستی یەکێتی دیدگایەکی بەرپرسیارانە و دەربەستە بە چارەسەرکردنی ئاشتییانەی کێشەکان و بوونی پەیوەندی هاوسەنگە لە نێوان هەموو جەمسەر و لایەنەکان تا بتوانین وڵاتەکەمان لە شەڕ و ناکۆکییەکان بپارێزین.
