پەرلەمانتارێکی کوردستان ڕەخنە لە وەزارەتی دارایی دەگرێت بەوەی هەندێکجار ئەو بڕیارە باشانەی لە بەرژەوەندی پارێزگاکەی دەدرێن جێبەجێ ناکات.
کاوە عەلی، نوێنەری هەڵەبجە لە پەرلەمانی کوردستان ڕایگەیاند، بەداخەوە وەزارەتی دارایی هەندێک جار بڕیارە باشەکان کە لەبەرژەوەندی پارێزگای هەڵەبجە بن جێبەجێ ناکات تەنانەت ئەگەر بڕیاری سەرۆک وەزیرانیش بێت و زۆر ئاسایی بووە.
ڕوونیشیکردەوە کە بڕیاری پێدانی ڕێژەی %20ی داهاتی مەرزەکان لەگەڵ ئەوەی لە 2024/2/22 کە نزیک دەبێتەوە لە یەک ساڵ دەرچووە، هەروەها نووسراوی ئەنجومەنی وەزیران کە 2024/7/21 واتا شەش مانگ زیاترە دەرچووە، نەچووەنەتە بواری جێبەجێکردن.
کاوە عەلی ئەوەشی خستەڕوو کە بریاری کاراکردنی بەڕێوەبەرایەتی گومرگی هەڵەبجە و گواستنەوە و دامەزراندن و دابینکردنی میلاک بۆ بەڕێوەبەرایەتیش جێبەجێ نەکراوە کە 2024/7/15 دەرچووە و تەنها 15 ڕۆژ بۆ جێبەجێکردنی دیاری کرابوو.
ئەندامەکەی پەرلەمانی کوردستان ڕاشیگەیاند پێویستە ئەنجومەنی وەزیران بەدواداچوون بکات بۆ ئەو خاڵانەی کە ڕۆژی 2024/2/22 بەڵێن و بڕیاری لەسەر درا و بزانێت چی کراوە و چی نەکراوە گرفت و کۆسپ لە کوێدایە؟
