دوابەدوای بڵاوبوونەوەی دەنگۆی كشانەوەی هێزەكانی ئەمریكا لە سووریا لەلایەن میدیایەكی ئەمریكییەوە، ئەنجوومەنی سووریای دیموكرات ڕایدەگەیەنێت، هیچ ئاماژەیەک بۆ کشانەوەی نزیکی ئەمریکا لە سووریا نییە بەڵكو زیاتریشیان كردووە و ڕۆژنامەنووسێكیش لە واشنتۆن دەڵێت: ترەمپ باسی مەلەفی غەززەی کرد، واتە بوونی ئەمریکا لە ڕۆژهەڵاتی ناوەڕاست زیاد دەکات، نەک بە کشانەوەی.
هێزەكانی سوریای دیموكرات “هەسەدە” ڕایدەگەیەنێت، كە ئاگاداری هیچ پلانێك نیین بۆ كشانەوەی هێزەكانی ئەمریكا.
شەوی ڕابردوو، كەناڵی (ئێن بی سی)ی ئەمریكی بڵاویكردەوە، كە پنتاگۆن پلانی هەیە هێزەكانی لە سووریا بكشێنێتەوە، ئەمەش كاردانەوەی لێكەوتەوە و وەك مەترسییەك سەیركرا بۆ سەر ئیدارەی خۆسەری ڕۆژئاوای كوردستان، كە بە كشانەوەی ئەمریكا دەستی توركیا بۆ پەلاماردانی كورد دەكرێتەوە و هێرشەكانی بۆ سەر ڕۆژئاوا چڕ دەكاتەوە.
هاوكات، هەر دوێنێ سێ شەممە، ئەحمەد شەرع، سەرۆكی كاتی سووریا گەیشتە ئەقەرە و لەگەڵ ڕەجەب تەیب ئەردۆغان، سەرۆك كۆماری توركیا كۆبووەوە و (ڕۆیتەرز) لە زاری چەند سەرچاوەیەكەوە بڵاویكردەوە، كە ڕێككەوتنی ئەمنی واژۆ دەكەن، بەجۆرێك تورکیا بنکەی ئاسمانی لە سووریا دادەمەزرێنێت و هەروەها تورکیا مەشقپێکردنی سوپای نوێی سووریا لە ئەستۆ دەگرێت و ئاسمانی ئەو وڵاتە دەپارێزێت، كە ئەمەش بە مەترسییەكی دیكە بۆ سەر پێگەی كورد لە ڕۆژئاوای كوردستان لێكدەدرێتەوە.
ئەنجوومەنی سوریای دیموکرات (مەسەدە) لە بەیاننامەیەكدا ئاماژەی بەوەكردووە، هیچ ئاماژەیەک بۆ کشانەوەی نزیکی ئەمریکا لە سووریا نییە، بەڵكو هێزەکانی ئەمریکا لەم دواییانەدا ئامادەیی سەربازی خۆیان بەهێزتر کردووە.
ڕاشیگەیاندووە، ئێمە پشتیوانی بەردەوامی بوونی هێزەکانی ئەمریکا دەکەین تا دۆخی سووریا سەقامگیر دەبێت و هەماهەنگی بەردەوام و نزیكمان لەگەڵ واشنتۆن و هاوپەیمانی نێودەوڵەتی هەیە.
جەختیشی كردۆتەوە، تورکیا ناتوانێت گڵۆپی سەوز بۆ هێرشكردنە سەرمان وەربگرێت و دەشڵێت: چارەسەرکردنی پرسی کورد بە شێوەیەکی دیپلۆماسی سوودی بۆ تورکیا دەبێت.
مەسەدە ئاماژەی بەوەشكردووە، لە ئەگەری کشانەوەی ئەمریکادا بەرگری لەو دەستکەوتانە دەکەین، کە بەدەستمان هێناوە.
لای خۆشیەوە، ڕۆژنامەنووس ڕۆبن ڕەشفان لە واشنتۆن سەبارەت بە هەواڵەکەی (ئێن بی سی) کە باس لە پلانەکانی پنتاگۆن دەکات بۆ کشانەوەی هێزەکانی ئەمریکا لە سووریا وتی، “هەمیشە پلان بۆ پنتاگۆن هەیە، بەڵام هیچ پلانێک نییە بۆ کشانەوەی هێزەکان لە سووریا لەسەر کارنامەی سەرۆک ترەمپ”.
وتیشی، “ئەم هەواڵە لە دەرەوەی وڵاتەوە ئامادەکراوە، واتە لە لایەن هەندێک ڕۆژنامەنووسەوە، کە ئەم بابەتە دەوروژێنن و بەو مانایە نییە کە لە لایەن بڕیاردەرانی ئیدارەی ئەمریکا پەسەند کراوە”.
ئاشكراشی كردووە، ترەمپ باسی مەلەفی غەززەی کرد، واتە بوونی ئەمریکا لە ڕۆژهەڵاتی ناوەڕاست زیاد دەکات، نەک بە کشانەوەی هێزەکانی لە سووریا.
روانگەی سوریا بۆ مافەكانی مرۆڤ رایگەیاند، سەرلەبەیانی ئەمڕۆ (17) بارهەڵگری داخراو و تەنکەری سوتەمەنی و سندوقی داخراو، کە کەرەستەی سەربازی و لۆجستییان هەڵگرتبوو، لە هەرێمی کوردستانەوە لە ڕێگەی دەروازەی ئەلوەلیدەوە بەرەو بنکەکانی هاوپەیمانان لە پارێزگای حەسەکە بەڕێکەوتن.
راشیگەیاند، ئەمە سێیەم کاروانی وشکانییە لە ماوەی کەمتر لە (٢٤) کاتژمێردا.
ئەمە لەكاتێكدایە، كە دۆناڵد ترەمپ دوای دیداری لەگەڵ بنیامین ناتانیاھو بە ڕۆژنامەوانانی وت: “ئەمریکا کۆنترۆڵی غەززە دەکات، ھەروەھا ئەمریکا دەبێت بە خاوەندارێتی درێژخایەنی غەززە”.
لە بەرامبەریشدا بنیامین ناتانیاھو، سەرۆک وەزیرانی ئیسرائیل لە کۆنفرانسێکی ڕۆژنامەوانیی ھاوبەشدا لەگەڵ دۆناڵد ترەمپ لە کۆشکی سپی ڕایگەیاند،” سێ ئامانجی ئێمە لە شەڕدا ئەوەیە، کە غەززە نەبێت بە ھەڕەشە، دۆناڵد ترەمپ داھاتوویەک بۆ ئەو پارچە زەوییە (واتا غەززە) دەبینێت، کە جێگای سەرنجی تیرۆریستەکانە، ئەو بیرۆکەیەکی دیکەی ھەیە کە جێگای گرنگیدانە و ئێستا تیمەکەی کاری لەسەر دەکەن و ئەمە بیرۆکەیە کە دەتوانێت ڕێڕەوی مێژوو بگۆڕێت”.
بانگەشەی ئەوەشی کرد، کە ئیسڕائیل و ئەمریکا پێکەوە شەڕی دوژمن دەکەن و پێکەوە کار دەکەن بۆ گۆڕینی نەخشەی ڕۆژھەڵاتی ناوەڕاست.
