بەشی پێشبینی کەشناسی هەرێم ڕاگەیەندراوێکی لە بارەی هاتنی شەپۆلێکی بەفر و بارانبارین بڵاوکردەوە و ڕایگەیاند، بارانبارینی بە لێزمە ناوچەکانی هەرێم دەگرێتەوە.
کەشناسی هەرێم لە بڵاوکراوەیەکدا ئاشکرای کرد: لە ئێوارەى ڕۆژى چوارشەممە کاریگەرى شەپۆڵی نزمە پاڵە پەستۆى دەریاى سپى ناوەڕاست درێژ دەبێتەوە بۆ سەر ناوچەکەمان، سەرەتا لە ناوچە شاخاوییە بەرزەکان و سنوورییەکان و بەشێک لە ناوچەى جیاجیا نمە باران دەسپێدەکات لەکاتەکانى ئێوارە لەگەڵ بەفرێکى کەم لە سەر ناوچە سنوورییەکان.
باسی لەوەشکردووە: ڕۆژى پێنجشەممە کاریگەرى ئەم شەپۆلە لەسەر ناوچەکەمان زیاد دەکات و باران لەسەرجەم ناوچەکەمان دەبارێت و ئاستى باران مامناوەند و هەندێ کات لێزمە باران دەبێت و ئەگەرى هەورە تریشقەش هەیە لەگەڵ بارانبارین لە ئەنجامى هاتنى بارستە هەواییەکى سارد شەپۆلێکى بەفربارین ناوچە سنوورییەکان و شاخاوییەکان دەگرێتەوە.
بەپێی ڕاپۆرتەکەی کەشناسی هەرێم، کاریگەرى ئەم شەپۆلە لە ئێوارەى ڕۆژى چوارشەممەوە دەستپێدەکات تا کاتەکانى بەیانى ڕۆژى هەینى بەردەوام دەبێت، پلەکانى گەرما بە گشتى نزم دەبێتەوە بە پێنج بۆ حەوت پلەى سیلیزى و لە ناوچە شاخاوییەکان لە کاتەکانى بەرەبەیان دادەبەزێت بۆ سفر پلەى سیلیزى.
دەشڵێت: سەبارەت بە خێراى با لە سنوورى پارێزگاى هەولێر زیاد دەکات بۆ سەرووى 35 کیلۆمەتر لە کاتژمێرێکدا.
