سەرۆکی پارتی سۆسیال دیموکرات هەنگاوی ڕادەستکردنی نەوتی هەرێم بە بەغدا بە هەنگاوێکی ناتەندروست دەزانێت و دەڵێت” نەوتی هەرێم لە ژێرزەمیندا بمێنێتەوە باشترە وەک لەوەی بدرێتە عێراق”
محەمەد حاجی مەحمود، سەرۆکی پارتی سۆسیال دیموکراتی کوردستان ڕایگەیاند، بەداخەوە لە کوردستان و عێراق و تەنانەت ناوچەکەش کار نە بەدستوور دەکرێت نە بە یاسا، بەڵکو ئەوەی هەیە گەڕانەوەیە بۆ بەرژەوەندی و لەکوێدا بەرژەوەندی هەبوو پەیوەندییەکان باش دەبن.
ئاماژەی بەوەشدا، کارنەکردن لە هەرێم بە دەستوور و یاسا گرفتی دروستکردووە، چونکە ئێمە دەبوایە دوای 15 ڕۆژ لە پەسەندکردنی ئەنجامەکانی هەڵبژاردن پەرلەمان دەستی بەکارەکانی بکردایە، بەڵام تائێستا وا سێ مانگ تێدەپەڕێت و وەک خۆی ماوەتەوە، بابەتەکەش تەنها لەسەر ڕێککەوتنی پارتی و یەکێتی ماوەتەوە، چونکە ئەوە 34 ساڵە ئەو دوو حیزبە سەرۆک و جێگری دامەزراوەکانیان لایە و هیچ گۆرانکارییەک ڕووینەداوە.
سەبارەت بە پەسەندکردنی هەمواری یاسای بودجە و هەناردەی نەوتی هەرێم، محەمەدی حاجی مەحمود رایگەیاند، دەبوایە نەوتی هەرێم نەدرایە بە بەغدا، با نەوتی هەرێم لە ژێرزەمیندا بمێنێتەوە باشترە وەک لەوەی بدرێتە عێراق، چونکە دەبێت لەمەولا بڵێین”نەوتی کوردستان دەفرۆشرێت بۆ گیرفانی بەغدا”.
ئاماژەی بەوەشدا، دەبوایە حکومەتی هەرێم پلانی هەبوایە و دەبوایە پاشەکەوتی بکردایە بۆ ئەوەی توشی قەیران نەبێ.
