سەرۆکی فراکسیۆنی یەکێتی لە پەرلەمانی عێراق ئاشكرای دەكات، سبەینێ بەغدا مووچە دەنێرێت و سەرچاوەیەكیش لە شاندی هەرێم دەڵێت: بڕیارە راپۆرتێکی هاوبەش بخرێتە بەردەم تەیف سامی و واژۆی لەسەر بکات.
هەرێم کەمال ئاغا، سەرۆکی فراکسیۆنی یەکێتی لە بەغدا ڕایگەیاندووە، بڕیارە سبەینێ بەغدا مووچەی مانگی یەک بنێرێت و ئەمساڵیش وەک ساڵی ڕابردوو کێشە بۆ مووچە دروست نابێت .
وتیشی، “کاری باش کراوە لەلایەن تیمەکانی وەزارەتی داراییەوە و کۆمەڵێک پرسی تەکنیکی هەبوو هەمووی چارەسەکراوە، هیودارین ئەمە ببێتە چارەسەری بنەڕەتی و دڵنیاییش دەدەم بەخەڵک ئەمساڵ قۆناغێکی نوێ دەبێت بۆ مووچەخۆرانی هەرێم”.
جەختیشی كردەوە، کار لەسەر ئەوەشکراوە ساڵی ٢٠٢٥ کێشەی مووچە نەمێنێت، ئەو مووچەیەی کە سبەینێ دێت هی مانگی یەک-ە و لەسەر ئەو بنەمایە مووچەی ساڵەکە دێت.
لای خۆشیەوە، ئەندامێكی شاندی حكومەتی هەرێمی كوردستان لە بەغدا بۆ میدیاكانی یەكێتی وتویەتی، “لە 90%ـی كارەكان تەواو بوون و گفتوگۆ هونەریی و تەكنیكییەكان تایبەت بە لیستی مووچە بەردەوامن”.
وتیشی “لەبارەی دوایین كارە تەكنیكییەكان بۆ لیستی مووچە و تەرازووی پێداچوونەوەی مانگی 12ـی 2024، بەشێك لە ئەندامانی لیژنە هاوبەشەكە ڕاپۆرتێك بۆ تەیف سامی وەزیری دارایی عێراق ئامادە دەكەن و لەسەر بنەمای راپۆرتە هاوبەشەكە بڕیار دەدات و واژۆ لەسەر تەمویلی مووچەی مانگی یەك-ی 2025 دەكات، هەروەها لەو ڕاپۆرتەدا بە بڕگەیەك باسی مووچەی مانگی 12 دەكرێت و تەرازووی پێداچوونەوەی لەگەڵدا هاوپێچ دەكرێت”.
