وەزارەتی سامانە سرووشتییەكانی حكومەتی هەرێمی كوردستان هەڵوێستی خۆی بەرامبەر هەمواری یاسای بودجە و هەناردەكردنی نەوتی هەرێم ڕادەگەیەنێت و دەڵێت: دەستپێكردنەوەی هەناردەی نەوت هەنگاوێكی ئەرێنییە بۆ گەیشتن بە چارەسەری كۆتایی.
وەزارەتی سامانە سرووشتییەكانی حكومەتی هەرێم لە ڕاگەیەنراوێكدا ئاماژەی بەوەكردووە، پەسەندکردنی هەمواری یاسای بودجەی عێراق تایبەت بە تێچوونی دەرهێنان و گواستنەوەی نەوتی هەرێم لە پەرلەمانی عێراق و دەستپێکردنەوەی هەناردەکردنی نەوتی هەرێمی کوردستان بە هەنگاوێکی ئەرێنی بۆ گەیشتن بە چارەسەری کوتایی دۆسێی نەوت دەزانێت.
ڕاشیگەیاندووە، ئومێدەوارین ئەم هەنگاوە دەستپێكی قۆناغێكی نوێ بێت لە چارەسەرکردنی تەواوی کێشەکان و وەزارەتی نەوتی فیدراڵ كار بۆ جێبەجێكردنی یاساكە و تێپەڕاندنی تەواوی کێشەکان و ئامادەکردنی رێكارە تەكنیكییەكانی بكات.
دوێنێ پەرلەمانی عێراق هەمواری یاسایی بودجەی فیدڕاڵی پەسەند كرد، كە تیایدا بڕی 16 دۆلار بۆ تێچووی بەرهەمهێنانی هەر بەرمیلێك نەوتی هەرێم دیاری كراوە و لەڕێگەی سۆمۆ-وە دەست بە هەناردەكردنەوەی نەوتی هەرێم دەكرێت.
