پەرلەمانی عێراق هەمواری یاسای بودجەی پەسەند كرد، كە تیایدا بڕگەی تایبەت بە هەناردەكردنەوەی نەوتی هەرێم و پارەی تێچووی بەرهەمهێنانی نەوت دیاریكراوە.
بەپێی یاساکە، هەناردەکردنەوەی نەوتی هەرێمی کوردستان دەستپێدەکاتەوە لەڕێگەی سۆمۆوە، نرخی دەرهێنان و گواستنەوەی هەر بەرمیلێک نەوتی کوردستان بە 16 دۆلار دیاریکراوە بۆ ماوەی 60 ڕۆژ.
هەر بەپێی یاساكە، لایەنی ڕاوێژکاریی تایبەتمەندی نێودەوڵەتی لە ماوەی 60 ڕۆژدا نرخی دەرهێنان و گواستنەوەی بەرمیلێک نەوت لە هەر کێڵگەیەک بە جیا دیاری دەکات.
بە گوێرەی هەمواری یاساكە، هەرێمی کوردستان ڕۆژانە 400 هەزار بەرمیل نەوت ڕادەستی کۆمپانیای سۆمۆ دەکات.
سیپان شێروانی، ئەندامی فراکسیۆنی پارتی لە پەرلەمانی عێراق ڕاگەیاند “بە دەنگدان لەسەر هەمواری بودجە، دووبارە دەست بە هەناردەکردنەوەی نەوتی کوردستان دەکرێت و هیچ بەربەرستێکی یاسایی لە بەردەمیدا نەماوە.”
ئاماژەی بەوەشکرد، پێویستە حکومەتی فیدراڵیش پابەند بێت بە خەرجکردنی هەموو شایستە داراییەکانی هەرێمی کوردستان کە لە یاسای بودجەدا ئاماژەیان پێ دراوە.
وتیشی، “لە چەند ڕۆژی داهاتوودا، ڕێنماییەکانی جێبەجێکردنی هەمواری یاسای بودجەی گشتیی فیدڕاڵی، ئاراستەی هەموو لایەنە پەیوەندیدارەکان دەکرێت”.
