بڕیارە وەزارەتی دارایی عێراق لە سبەینێوە دەست بە ناردنی پارەی مانگی یەکی ساڵی 2025 بکات و سەرچاوەیەکیش وادەی دابەشکردنی لە هەرێم ئاشکرا دەکات.
میدیای نزیک لە پارتی لەزاری سەرچاوەیەکی باڵای حکومەتی هەرێم کە بەشداربووی کۆبوونەوەکەی ئەمڕۆ بووە بڵاویکردەوە، بەغدا ڕەزامەندی داوە بە ناردنی بڕی 950 ملیار دینار بۆ مووچەی مانگی یەک و پێدەچیت لە سبەی یان دوو سبەی بگاتە هەرێم.
ئاماژەی بەوەشداوە، بەناردنی پارەکە چاوەڕواندەکرێت وەزارەتی دارایی هەرێم لە ڕۆژی سێ شەممە بەدواوە دەست بکات بە دابەشکردنی مووچەی مانگی یەکی مووچەخۆرانی هەرێم.
سەبارەت بە خانەنشینان، ئەو سەرچاوەیە ئەوەی خستۆتەڕوو، “لە مووچەی مانگی یەک، پارەی خانەنشینکراوای کوردستان دەرهێنراوە، ئەوانەی تازە بە یاسای عێراق خانەنشین کراون و تەمەنیان لەنێوان 60 تاوەکو 63 ساڵە.”
پێشتر لە میدیاکاندا وابڵاوکرایەوە کە ناردنی پارە بۆ مووچەی مانگی یەک دەکەوێتە ناوەڕاستی مانگی دوو، بەڵام کۆبوونەوەکەی شاندی هەرێم و بەغدا و ئەو لێکتیگەیشتنەی هەبووە وادەی پێشخستووە.
بەپێی زانیارییەکان، ئەمڕۆ بەغدا ڕەزامەندی لەسەر ناردنی بڕی 950 ملیاردینار بۆ مووچەی مانگی یەک دا و پێشبینی دەکرێت هەر ئەمشەو واژوی ناردنەکە بکرێت و لە سبەینێوە پارەکە بۆ هەرێم بگوازرێتەوە و بەگەیشتنی پارەکەش دارایی هەرێم دەست بە دابەشکردنی مووچە دەکات.
