هاوسەرۆکی بەشی پەیوەندییەکانی دەرەوە لە ئیدارەی خۆسەری دیموکراتی باکوور و ڕۆژهەڵاتی سووریا ڕایگەیاند، هێرشەکانی دەوڵەتی تورکیا و گرووپە چەكدارەكانی بۆ سەر بەنداوی تشرین و دەوروبەری کۆبانی و بۆردومانەکان، کە لەلایەن فڕۆکە جەنگییەکانەوە ئەنجام دەدرێن، بەشێکن لەو سیاسەتانەی کە ئامانجیان کۆنتڕۆڵکردنی هەموو جوگرافیای سووریایە.
ئیلهام ئەحمەد، هاوسەرۆكی پەیوەندییەكانی دەرەوەی ئیدارەی خۆسەر ئاماژەی بەوەشکرد، تورکیا هەوڵدەدات سووریا بخاتە ژێر سەرپەرشتی تەواوی خۆیەوە بەمەبەستی جێبەجێکردنی میساقی نیشتمانی، دوای ئەوەی ماوەیەکە هەوڵی کۆنتڕۆڵکردنی تەنها هەندێک شار دەدات.
وتیشی، “ئەو شەڕانەی لە بەنداوی تشرین ڕوودەدەن، شەڕی بەرگریکردنە لە هەموو سووریا، نەک تەنها باکوور و ڕۆژهەڵاتی سووریا، چونكە ئەم بەرخۆدانە بەرگری لە ئیرادەی سووریا دەکات، هەربۆیە بەرخۆدانێکی ڕەوایە”.
ئاماژەی بەوەشكرد، دوای ئەو گۆڕانکارییەی کە لە دیمەشق ڕوویدا و لە چوارچێوەی پەیوەندییە نێودەوڵەتییەکان، هێشتا بەردەوامن و باشن و لەم دواییانەشدا کۆبوونەوەی بەرفراوانمان ئەنجامدا بۆ خستنەڕووی دیدگای پڕۆژەی خۆبەڕێوەبردن وەک مۆدێلێک بۆ چارەسەر و باسمان لە ئایندەی گەلانی باکوور و ڕۆژهەڵاتی ناوچەی سووریا کرد و کەناڵی نوێ هەیە و هەموویان هەڵوێستی خۆیان دەربڕی لەسەر پێویستی بەشداربوونی گەلانی ناوچەکە لە بنیاتنانی سووریای داهاتوو، سووریای لامەرکەزی، سووریایەکی دیموکراسی کە هەموو سوورییەکان یەکدەخات.
جەختیشی كردەوە، دەبێت پڕۆسەی سیاسی هەمەچەشن بێت بۆ ئەوەی لەگەڵ سروشتی سووریادا بگونجێت، چونکە بەپێی دیدگاکەمان چەندین نەتەوە و کولتووری تێدایە، ئێمە دووپاتی دەکەینەوە، کە پڕۆژەی خۆبەڕێوەبردن تاکە هیوایە بۆ بەدەستهێنان سەقامگیری و ئاشتی لە سووریا.
ئیلهام ئەحمەد وتیشی، “ئێمە لەگەڵ دیالۆگی نەتەوەیی سووریا و یەکڕیزی خاکی سووریاداین و هەوڵی دابەشکردنی سووریا نادەین وەک هەندێک دوژمنکارانە لایەنەکان ئیدیعا دەکەن، بە تایبەت تورکیا و ئەم تۆمەتانە دوورن لە ڕاستییەوە، وەک چۆن ئێمە و هەموو پێکهاتەکان لەگەڵ یەکتر لە باکوور و ڕۆژهەڵاتی سووریا دەژین”.
