ئەمشەو سودانی كۆبوونەوەی بەپەلە بۆ مووچە دەكات

بڕیارە كاتژمێر 8ی ئەمشەو لە ماڵی سەرۆك وەزیرانی عێراق كۆبوونەوەیەكی بەپەلە دەربارەی هەمواركردنەوەی یاسای بودجە و پرسی مووچەی مووچەخۆرانی هەرێمی كوردستان ئەنجام بدرێت.

د.ڤیان سەبری، سەرۆكی فراكسیۆنی پارتی لە پەرلەمانی عێراق بە میدیاكانی پارتی ڕاگەیاندووە، ئەمشەو سەرۆك و جێگرانی سەرۆكی پەرلەمانی عێراق و سەرۆكی سەرجەم فراكسیۆنەكانی پەرلەمانی عێراق لە ماڵی محەمەد شیاع سودانی، سەرۆك وەیزران كۆدەبنەوە.

ئاشكراشی كردووە، ئامانجی كۆبوونەوەكە قسەكردنە لەسەر هەمواری پرۆژە یاسای بودجە و پرسی مووچەی فەرمانبەرانی هەرێم.

جەختیشی كردۆتەوە، شاخەوان عەبدوڵڵا، جێگری سەرۆكی پەرلەمان و سەرۆك فراكسیۆنە كوردستانییەكان لە كۆبوونەوەكەدا بەشدار ئەبن.

لە كۆبونەوەكەدا گفتوگۆ لەسەر هەمواری یاسای بودجە دەكرێت، كە بەشێكی تایبەتە بە هەناردەكردنەوەی نەوتی هەرێم و دیاری كردنی 16 دۆلار بۆ تێچوونی هەر بەرمیلێك نەوتی هەرێم لەگەڵ باسكردن لە مووچەی مانگی 12ی 2024 و مانگی 1ی ئەمساڵی مووچەخۆرانی هەرێم.

دارا سێکانیانی، ئەندامی پەرلەمانی عێراق رایگەیاند، ئەمشەو فراکسیۆنە کوردییەکانی بەغدا، لە ماڵی سودانی کۆدەبنەوە و ئامانجی کۆبونەوەکە قسەکردنە لەسەر هەمواری پرۆژە یاسایی بودجە.
وتوشییەتی، لە کۆبونەوەکەدا گفتوگۆ دەکرێت لەسەر ئەو هەموارەی یاسای بودجە کە پێشتر هاتە پەرلەمان لەگەڵ ئەو هەموارە تازەیەی ئێستا و باسی مووچەی مانگی 12ی فەرمانبەرانی هەرێمیش دەکرێت.

ئەمڕۆ چوار شەممە، كۆبوونەوەی شاندی باڵای کوردستان لە وەزارەتی دارایی و ئابووری لە هەولێر كۆتایی هات، کە لە کۆبوونەوەکەدا لیستی مووچە و لیستی خانەنشینان و میزان موراجەعەی مانگی 12ی ساڵی ڕابردوو گفتوگۆیان لەسەر کرا و سەرجەمیان تەواو بوون و بڕیارە سبەینێ‌ شاندی هەرێم بگاتە بەغدا و ڕۆژی هەینی كۆبوونەوەی شاندی باڵای هەرێم و عێراق بەسەرۆكایەتی تەیف سامی و ئاوات شێخ جەناب ئەنجام بدرێت.

 

پەیوەنیدر