دادگاى فیدراڵیی عێراق تاووتوێی سکاڵایەک دەکات بۆ هەڵوەشاندنەوەى هەردوو وەزارەتى شەهیدان و کاروباری ئەنفالکراوان و ئەوقاف و کاروبارى ئایینى هەرێمى کوردستان پێشکەش کراون.
ئەمڕۆ سێشەممە، دووەم دانیشتنى دادگاکە لەسەر ئەو دوو سکاڵایە دەکرێت، کە لەلایەن کەسێکەوە بەناوى خالید مستەفا حوسێن تۆمارکراون.
لە یەکێک لە سکاڵاکاندا داواکراوە وەزارەتى ئەوقاف و کاروبارى ئایینى هەڵبوەشێندرێتەوە، بەوپێیەى دژى پێنج مادەى دەستوورى عێراقە و لە برى ئەو وەزارەتە، وەقف بۆ پێکهاتەکان دروست بکرێن، کە لە ڕووى کارگێڕی و داراییەوە سەربەخۆ بن و ببەسترێنەوە بە ئەنجوومەنى وەزیرانەوە.
یاساى وەزارەتى ئەوقاف و کاروبارى ئایینیى هەرێمى کوردستان لە ساڵى 2007 لە پەرلەمانى کوردستان دەرکراوە، سکاڵاکار داوا دەکات ئەو یاسایە بە نادەستوورى هەژمار بکرێت، پەرلەمان ناچار بکرێت دیوان بۆ ئایین و مەزهەبە جیاوازەکان پێکبهێنێت و ببەسترێنەوە بە ئەنجوومەنى وەزیرانەوە.
بەگوێرەى بڕگەکانى یەکەم و سێیەمى مادەى 103ی دەستوور، وەقفەکان دەستەى سەربەخۆن لە ڕووى دارایی و کارگێڕییەوە دەبێت ببەسترێنەوە بە ئەنجوومەنى وەزیرانەوە.
سکاڵاکەى دیکە داوا دەکات دادگاى باڵاى فیدراڵى وەزارەتى شەهیدان و کاروبارى ئەنفالکراوانى هەرێمى کوردستان بە نادەستوورى بزانێت، کە بەگوێرەى یاسای ژمارە 8ى ساڵى 2006 پێکهێنراوە. پەرلەمان و حکومەتى هەرێمى کوردستان ناچار بکرێن دەستەیەک بە ناوى دامەزراوەى شەهیدان پێکبهێنن کە سەر بە ئەنجوومەنى وەزیران بێت و لە رووى دارایی و کارگێڕییەوە سەربەخۆ بێت و یاسایەکى بۆ دەربکرێت.
یەکەم دانیشتنى دادگەى باڵاى فیدڕاڵى لەسەر ئەو دوو سکاڵایە لە 23ى کانوونى یەکەمى 2024 کرا و لەسەر داواى نوێنەرى یاسایی پەرلەمانى کوردستان دواخرا.
