بازاڕی دراوە بیانییەكان بەرامبەر بە دیناری عێراقی ناجێگیرە و دۆخی ڕۆژهەڵاتی ناوەڕاست و گرژییەكان كاریگەرییان لەسەر بەهای دراوەكان هەیە.
ڕەوەند میرزا لە بازاڕی دۆلارەكەی سلێمانی بۆ (خەڵك) ڕایگەیاند، نرخی تمەنی ئێرانی و لیرەی سووری لە مامەڵەی ئەمڕۆ بەرامبەر بە دراوەكان بەرزبوونەوەیان تۆماركردووە.
ڕاشیگەیاند، “ئەمڕۆ دوو شەممە بەهای 100 دۆلار بە 7 ملیۆن و 700 هەزار تمەن بە كاش و بە 8 ملیۆن تمەن بە حەواڵە مامەڵەی پێوەدەكرێت” لەكاتێكدا لە كۆتایی ساڵی ڕابردوودا گەیشتە 8 ملیۆن و 300 هەزار تمەن.
ئاماژەی بەوەشكرد، “نرخی لیرەی سووری لە ئەمڕۆدا بەهای یەك ملیۆن لیرە بە 168 هەزار بۆ 170 هەزار دیناری عێراقی مامەڵەی پێوەكراوە” ئەمەش لەكاتێكدا لە پێش كۆتایی ئەمساڵدا بە زیاتر لە 300 هەزار دینار بوو.
ئەمە لەكاتێكدایە، كە لیرەی سووری، دوای ڕووخانی ڕژێمی بەشار ئەسەد لە سەرەتای مانگی 12ی ساڵی ڕابردوودا بەهاكەی زۆر دابەزی و یەك ملیۆن لیرە بە زیاتر لە 500 هەزار دیناری عێراقی مامەڵەی پێوەدەكرا.
