وەزیری دەرەوەی ئیسرائیل هێرشێكى توند ده‌كاته‌سه‌ر ده‌سه‌ڵاتى ئێستاى سووریاو به “باندی تیرۆریستی” ناویان دەبات، دەشڵێت، “به‌ئاشكرا له‌لایه‌ن ئه‌ردۆغانه‌وه هه‌ڕه‌شه له‌كورد ده‌كرێت”.
گیدیۆن سار، وەزیری دەرەوەی ئیسرائیل لەکۆبونەوەیەکدا لەوەزارەتەکەی لەبارەی دۆخی سووریاوه په‌یامێكى بڵاوكرده‌وه‌و ڕایگه‌یاند، “لەجیهاندا خەڵک باسی گۆڕانکارییەکی ڕێکخراوەیی ڕژێم لەسووریا دەکەن، بەڵام ئەوەی ڕوویداوە وەک ئەوەنییە حکومەتێکی نوێ بەشێوەیەکی دیموکراسی چوبێتەسەر دەسەڵات”.
وتیشى: “دەسەڵاتدارانی نوێی سووریا باندێکی تیرۆریستین کە سەرەتا لەئیدلیب بوون، دواتر دەستیان بەسەر دیمەشقی پایتەخت و ناوچەکانی دیکەدا گرت، جیهان دەیەوێت ڕژێمێکی سەقامگیر لەسووریا ببینێت، چونکە وڵاتان دەیانەوێت ئەوکەسانە بگەڕێننەوە کە پێشتر لەسووریا هەڵاتبون، بەڵام ئەوەی ئێستا دەبیندرێت بەو جۆرە نییە”.
وەزیری دەرەوەی ئیسرائیل ئه‌وه‌شى وت: “شەڕ لەگەڵ عەلەوییەکان هەیە؛ هەڕەشەی ئاشکرا لەلایەن ئەردۆغانەوە بۆ نەهێشتنی خۆبەڕێوەبەری کورد هەیە؛ هەراسانکردنی کۆمەڵگەی کریستیانیش هەیە، حکومەتی نوێی سووریاش، ڕژێمێکی ئیسلامییە کە دەیەوێت کۆنترۆڵی هەموو سووریا بگرێتە دەست”.
قسه‌كانى وه‌زیرى ده‌ره‌وه‌ى ئیسرائیل له‌كاتێكدایه، ڕه‌جه‌ب ته‌یب ئه‌ردۆغان، سه‌رۆك كۆماری توركیا له‌میانی كۆنگره‌ی پارتی دادو گه‌شه‌پێدان (ئاكپارتی) له‌ویلایه‌تی به‌ڵكئه‌سیر له‌توركیا وتی، “توركیا له‌تاقیكردنه‌وه‌ی مرۆیی له‌سووریا سه‌ركه‌وتوو بوو، كاتێك بۆ ماوه‌ی 13 ساڵ، ئه‌ركی برایانه‌ی خۆی به‌رامبه‌ر سته‌ملێكراوان به‌جێهێنا، له‌سه‌ره‌تای ساڵی 2025یشه‌وه ئاسایشیی سنوره‌كانی توركیا له‌باشور زامن ده‌كه‌ین و هه‌ڕه‌شه‌كانی تیرۆر له‌ناو ده‌به‌ین، ئه‌نكه‌ره ده‌رگای به‌ڕوی ئاواره‌و په‌نابه‌رانی سووریایی واڵاكردوه بۆ ئه‌وه‌ی بگه‌ڕێنه‌وه وڵاته‌كه‌یان”.
