دوابەدوای ڕاگەیەنراوەكەی لیژنەی دارایی پەرلەمانی عێراق، كە تیایدا چاودێری دارایی فیدڕاڵ وتبووی “80%ی مووچەخۆرانی هەرێم تەوتین كراون”، بڕیاردەری فراكسیۆنی یەكێتی لە پەرلەمانی عێراق دەڵێت: “قسەكانی چاودێری دارایی عێراق مەبەستی لێی هەژماری من بووە نەك تەوتین” و جەختیشدەكاتەوە، سوورن لەسەر جێبەجێ كردنی بڕیاری دادگای فیدڕاڵی بۆ تەوتینی مووچە.
كاروان یاروەیس، بڕیاردەری فراكسیۆنی یەكێتی لە پەرلەمانی عێراق لە ڕوونكردنەوەیەكدا ئاماژەی بەوەكردووە، قسەکانی چاودێری دارایی فیدڕاڵ کە گوایە (٨٠٪) کارەکانی «تەوتین»ی مووچەی هەرێم تەواوبووە، لەمیدیاکانی کوردستان بەهەڵە لێکدرایەوە، ئەوان مەبەستیان «هەژماری من»ە نەک «تەوتین»ی ڕاستەقینە! چونکە هێشتا نە حکومەتی فیدڕاڵ بڕیاری یەکجارەکی داوە و نە حکومەتی هەرێمیش دەستبەرداری ڕکی خۆی بووە لەبارەی «هەژماری من» نە هیچ لقێکی بانکە فیدڕاڵیەکان لە شارەکانی هەرێم کراوەتەوە، ئیتر بۆ وا بەپەلە تێیئەکەون و وا خەڵک تێئەگەیەنن ئەوە مەبەستی تەوتنی فیدڕاڵیە.
وتیشی، ” ئێمە سوورین لەسەر جێبەجێ کردنی بڕیاری دادگای فیدڕاڵی لەبارەی تەوتینەوە، بەدەستی ١٥٠ واژۆی پەرلەمانتارانی عێراق و سەرۆکی فراکسیۆنە کوردستانیەکانمان ڕادەستی سودانی کرد، ئەویش بە نوسراو ناردویەتی بۆ وەزارەتی دارایی فیدڕاڵ و بانکی ناوەندی”.
ڕاشیگەیاندووە، پارێزگاری بانکی ناوەندی و هەندێ لە بەرێوەبەری بانکە فیدڕاڵیەکان لەجیاتی بڕیاری دادگای فیدڕاڵی لەبارەی تەوتین پشت بە ڕوونکردنەوەکەی دادگا دەبەستن، کە گوایە ڕێگە ئەدات بەو بانکانەی تۆمارکراون و مۆڵەتپێیدراون لە بانکی ناوەندی تەوتین بکەن. لەکاتێکدا بڕیاری دادگاکە هێزی دەستوری و یاسایی زۆرترە تا ڕوونکردنەوەکەی.
جەختیشی كردۆتەوە، چارەسەر نەکردنی کێشەی ڕادەست نەکردنی داهاتی نانەوتی و تەوتین، وا دەکەن کێشەی مووچە لەمە قووڵتر بێتەوە، ڕەنگە تا ڕادەی ڕاوەستاندنی تەمویلی مووچەش بڕوات و دەشڵێت: “فەرموون بەپارەی داهاتی نانەوتی و نەوتی فرۆشراو کورتهێنانی ئەم سێ مانگە پڕ بکەنەوە و لەوە زیاتر خەڵک ئەزێت مەدەن”.
بە وتەی ڕوونكردنەوەكەی فراكسیۆنی یەكێتی، “ئەبێ حکومەتی فیدڕاڵ بڕیاری ڕاشکاو و ڕوونی خۆی بدات لەبارەی تەوتینەوە، لەجیاتی کات کوشتن و خاوە خاوە تا ئەوەی «هەژماری من» ببێ بە ئەمری واقیع”.
ئاماژەی بەوەشكردووە، لەبارەی مووچە و چارەسەرکردنی کێشەکانی، ئەرکی ئێمە چاودێری و یاسادانان و فشار کردن بوە و لەمڕووەوە بێدرێغ کۆششمان کردوە، بەرپرسیاری یەکەم حکومەتی هەرێم و فیدڕاڵین نەک پەرلەمان.
