نوێنەری مامۆستایانی خوێندنی كوردی لە كەركوك لەگەڵ پارێزگار و بەشێكی ئەنجوومەنی پارێزگا كۆبوونەوە و بڕیارە بەم زووانە تەوتین بۆ مووچەی مامۆستایانی خوێندنی كوردی ئەو شارەی كوردستان بكرێت، كە میلاك و مووچەیان لەسەر حكومەتی هەرێمە.
پەروین فاتیح، ئەندامی ئەنجوومەنی پارێزگای کەرکوک، لە كۆنفڕانسێكی ڕۆژنامەوانیدا بە ئامادەبوونی نوێنەرانی مامۆستایانی خوێندنی كوردی ڕایگەیاند، مامۆستایانی خوێندنی کوردی داوای تەوتین دەکەن و بۆ ئەو مەبەستەش لەگەڵ پارێزگاری كەركوك كۆبوونەتەوە و لای خۆیەوە پارێزگار نووسراوی كردووە بۆ ئەنجوومەنی وەزیران و وەزارەتی پەروەردەی فیدڕاڵی.
ڕاشیگەیاند، مامۆستایانی خوێندنی كورد مووچە و میلاكیان لەسەر حكومەتی هەرێمە، بەڵام داوا دەكەن لەسەر بانكەكانی ڕەشید و ڕافیدەین تەوتینی مووچەكانیان بكرێت، كە ئەوەش مافی یاسایی خۆیانە.
ئاشكراشی كرد، پارێزگاری كەركوك لە كۆبوونەوەكەدا بە تەلەفۆن لەگەڵ وەزارەتی پەروەردە و ئەنجوومەنی وەزیران قسەی كردووە بە مەبەستی خێراكردنی ڕێكارەكانی تەوتینی مووچەی ئەو مامۆستایانە.
وتیشی، “بڕیارە بەم زووانە ڕێكارەكانی تەوتینی مووچەی مامۆستایانی خوێندنی كوردی لە كەركوك ئەنجام بدرێت”.
مامۆستایانی خوێندنی كوردی لە كەركوك لەڕووی میلاك و مووچەوە لەسەر حكومەتی هەرێمی كوردستانن، بەلام لە ماوەی ڕابردوودا لە گفتوگۆ و دانووستانەكانی شاندی هەرێم و عێراق جەختلەوەكرایەوە، كە پێویستە میلاكی ئەو مامۆستایانە بخرێتەوە سەر وەزارەتی پەروەردەی فیدڕاڵی بەهۆی ئەوەی لە سنووری ئیداری حكومەتی فیدڕاڵیدان.
