بەپێی لێدوانی بەرپرسێکی وەزارەتی دارایی و ئابووری هەرێم، وردبینیی مووچە هەنگاوی باشی بڕیوە و ئەگەری هەیە سبەینێ پارەکە رەوانە بکرێت.
ئەو بەرپرسەی وەزارەتی دارایی هەرێم بە میدیاکانی پارتی ڕاگەیاند: “شەوی ڕابردوو شاندێکی وەزارەتی دارایی هەرێم گەیشتووەتە بەغداد، چوونی شاندەکە لەسەر داوای بەغدا بووە و زیاتر پەیوەندی بە چەند بابەتێکی دارایی و پرسی (هەژماری من) و گرێبەستی بانکی بازرگانیی عێراقەوە هەیە.”
لەبارەی وردبینیی لیستی مووچەی مانگی 10، ئەو سەرچاوەیەی وەزارەتی دارایی وتی: “وردبینیی لیستی مووچە هەنگاوی باشی بڕیوە و چاوەڕوانین ئەمڕۆ وردبینی تەواو بێت و سبەینێ چوارشەممە تەمویلی مووچە بنێردرێت، ئەو بەڵێنەیان پێ داوین”.
ئەوەشی زیاد کرد کە هەموو ئامادەکارییەکیان بۆ دابەشکردنی مووچەی مانگی 10 کردووه.
