سەرۆکی یەکێتی لەگەڵ کونسوڵی گشتی بەریتانیا لە هەرێم کۆبۆوە و وتی” هەنگاوێك لەپێناو دابینكردنی داهاتوویەكی گەشتر دەنێین”.
بافڵ تاڵەبانی، سەرۆکی یەکێتیی نیشتمانیی کوردستان لە دەباشان پێشوازییی لە ئاندرۆ بیزلی، کونسوڵی گشتیی بەریتانیا لە هەرێمی كوردستان كرد، و لە دیدارێکدا پێكهێنانی حكومەتی نوێ و هەماهەنگیی نێوان لایەنەكان بۆ چارەسەركردنی كێشەكانی هەولێر و بەغدا گفتوگۆیان لەبارەوەكرا.
هەر لە دیدارەکەدا جەخت لە پێكهێنانی حكومەتێكی خزمەتگوزار كرایەوە بەشێوەیەك ببێتە مایەی بەرەوپێشچوونی هەرێمی كوردستان و دەستەبەركردنی ژیانێكی شایستە بۆ خەڵكەكەی.
بافڵ تاڵەبانی ڕایگەیاند، هەنگاوەكانی یەكێتی بۆ پێكهێنانی حكومەتی نوێ روونە، خواست و داواكارییەكانی خەڵك بەرنامەی كاركردنمانە و هەموو هەنگاوێك لەپێناو دابینكردنی داهاتوویەكی گەشتر دەنێین.
سەرۆکی یەکێتی ئاماژەی بەوەشدا، كوردستان پێویستی بە خزمەت و پێكەوەیی هەیە نەك جیاكاری و تاكڕەوی كە خۆشبەختانە كۆتاییمان پێهێنا.
