دوای دزەپێکردنی ناوی ئەو کەسەی خەڵاتی باڵۆندۆر دەباتەوە یانەی ڕیاڵ مەدرید بڕیاریدا گەشتەکەی بۆ فەڕەنسا هەڵبوەشێنێتەوە، ئەمەش واتە ڤینیسیۆس ئامادەی ئەو ئاهەنگە نابێت چونکە وادەرەکەوێت براوەی خەڵاتەکە نییە.
بەپێی هەواڵێکی ڕۆژنامەی ئاسی ئیسپانی، فلۆرێنتینۆ پێرێز سەرۆکی یانەی ریال مەدریدی ئیسپانی کاتێک زانیویەتی ڤینیسیۆس جونیۆر خەڵاتی باڵۆن دۆر ناباتەوە زۆر تووڕە بووە، یانەی ریال مەدرید بڕوایان وایە دەبێ پێوەرەکانی بردنەوەی خەڵاتی باڵۆن دۆر ئاشکرا بکرێت، ئەوە روونە یوێفا و باڵۆن دۆر رێز لە ریال مەدرید ناگرن.
ڤینیسیۆس یەکێک بوو لەو پاڵێوراوانەی کە پێشەگ بوو بۆ بەدەستهێنانی خەڵاتی تۆپی ئاڵتونی، دوای ئەوەی وەرزی ڕابردوو لەگەڵ یانەی ڕیال مەدرید نازناوی خولی ئیسپانی و چامپیۆنزلیگی بەدەستهێنا، بەڵام ڕادیۆ مۆنتی کارلۆ ڕۆژی دووشەممە ئاشکرایکرد، لە هەندێک لاوە دزە بە ئەنجامی دەنگدان و هەڵبژاردنی براوەی باڵۆن دۆر کراوە و دەرکەوتووە ڤینیسیۆس نییە.
ڕۆژنامەی “مارکا”ی ئیسپانی دووپاتی کردەوە کە یانەی ڕیال مەدرید دوای ئەوەی زانیویەتی ڤینیسیۆس خەڵاتەکە ناباتەوە، بڕیاریداوە گەشتەکە نەکات، ئەمە جگە لە دوو ئەستێرەی تری پاڵێوراو بۆ ئەو خەڵاتە کە بریتین لە دانی کارڤاخال و جود بێلینگهام، بەپێی هەواڵەکە پێدەچێت ڕۆدری ئیسپانی بەهێزترین کاندید بێت بۆ بەدەستهێنانی خەڵاتەکە خەڵاتی باڵۆن دۆر.
لەماوەی پێشودا دەنگۆکان لەسەر بردنەوەی خەڵاتی باڵۆن دۆر لەلایەن ڤینیسیۆسەوە زۆر بەربڵاو بوو، تەنانەت زۆرێک لە وەرزشکارانی جیهان بەشایستەی ئەو خەڵاتەیان دەزانی، لای خۆشیەوە ڤینیسیۆس هیوای دەخواست یەکەم بەڕازیلی بێت کە خەڵاتەکە بەدەستبهێنێت لە دوای ڕیکاردۆ کاکا کە لە ساڵی ٢٠٠٧ خەڵاتەکەی بەدەستهێنا.
