بەیانی ئەمڕۆ چوارشەممە بزوتنەوەی حەماسی فەلەستینی لەڕاگەیەنراوێکدا ناوەڕۆکی ڕێککەوتن و ڕاگەیاندنی ئاگربەستی کاتی مرۆیی لەگەڵ ئیسرائیلدا بڵاوکردەوە.
بەگوێرەی ڕاگەیەنراوەکەی بزوتنەوەی حەماس ئاماژەی بەوەکردووە، لەگەڵ ئئیسرائیل سەبارەت بە ڕاگەیاندبنی ئاگربەستی مەرۆیی بۆماوەی چوار رۆژ گەیشتوونەتە ڕێککەوتن و ئەوەش بە نێوەندگیری هەریەکە لە میسر و قەتەر ئەنجامدراوە.
لە گرنگترین ئەو خاڵانەی حەماس لەگەڵ ئیسرائیل لەسەری رێککەوتووە بریتییە لە:
یەکەم: وەستاندنی شەڕ لەلایەن هەردوولاوە کۆتاییهێنانی ئیسرائیل بە ئەرکە سەربازییەکانی لە تەواوی ناوچەکانی کەرتی غەززە و جوڵە پێ نەکردنی ئۆتۆمبێل و تانکە سەربازییەکان لەناو غەززەدا.
دووەم: ڕێگەدان بە چوونەژوورەوەی سەدان بارهەڵگر بۆئەوەی یارمەتی و هاوکارییە تەندروستی و خۆراکی و مرۆییەکان بەبێ جیاوازی بگەیەنن بە هەموو ناوچەکانی کەرتی غەززە.
سێیەم: ئازادکردنی ٥٠ دیلی ئیسرائیل لەلایەن حەماسەوە کە لە ژنان و منداڵانی خوار تەمەنی ١٩ ساڵ پاێکدێن لەبەرامبەردا ئیسرائیل ١٥٠ ژن و منداڵی فەلەستینی ئازاد بکات.
چوارەم: کۆتاییهێنان بە جوڵەی فڕۆکەکانی ئیسرائل لە باشووری کەرتی غەززە بۆماوەی چوار ڕۆژ.
پێنجەم: کۆتایی هێنان بە جوڵەی فڕۆکەکانی ئیسرائیل لە باکوری غەززە ڕۆژانە بۆماوەی شەش کاتژمێر لە کاتژمێر ١٠ی بەیانییوە هەتا کاتژمێر ٤ی ئێوارە.
شەشەم: لەماوەی ئاگربەستەکەدا ئیسرائیل بەڵێن بدات هێرش نەکاتە سەر هیچ کەسێک لە تەواوی ناوچەکانی کەرتی غەززەدا.
حەوتەم: بەڵێندان و دڵنیایدان لە ئازادی هاتووچۆکردنی خەڵک لە باکورەوە بۆباشوور بەدرێژایی شەقامی سەلاحەدین.
لایخۆیەوە نوسینگەی سەرۆکوەزیرانی ئیسرائیل بنیامین نەتەنیاهۆ ئەمڕۆ چوارشەممە ڕایگەیاند، حکومەتی ئیسرائیل دەنگیداوە بە ڕێککەوتنی ئاگربەست و ئازادکردنی هەندێک لە دەستبەسەرکراوەکان لە غەززە.
بەگوێرەی ئاژانسی هەواڵی ڕۆیتەرزی ئەمریکی نوسینگەی سەرۆکوەزیرانی ئیسرائیل جەختی لەوەکردووەتەوە، لەماوەی چوارڕۆژدا ٥٠ دیل لەلایەن حەماسەوە ئازاد دەکرێن و لەوماوەیەدا جەنگ ڕادەگیرێت.
هاوکات، ئیسرائیل بەڵێنی داوە دوای تەواوبوونی وادەی ئاگربەستی نێوانیان بەردەوامبێت لە جەنگ دژی بزوتنەوەی حەماس هەتا کۆتاییان پێ دەهێنێت.
