ئیسماعیل هەنیە، سەرۆكی مەكتەبی سیاسی بزوتنەوەی حەماس ڕایگەیاند، بزوتنەوەكە لە گەیشتن بە ڕێككەوتنی ئاگربەست لەگەڵ ئیسرائیل نزیكبووەتەوە، لەكاتێكدا ئۆپەراسیۆنە سەربازییەكان لە غەززە و بوردومانكردنی ئیسرائیلیش لەڕێگەی مووشەوکەوە لەلایەن حەماسەوە بەردەوامن.
بەپێی ڕاگەیەندراوێك كە لەلایەن یاریدەدەرەكانییەوە بۆ رۆیتەرز نێردراوە، ئیسماعیل هەنییە ئاماژەی بەوەکردووە، “بزوتنەوەی حەماس وەڵامی قەتەر و نێوەندگیرەكانی داوەتەوە و ئەوان لە گەیشتن بە ڕێككەوتنی ئاگربەست نزیكبوونەتەوە”.
ئەوەش لەکاتکدایە، هیچ وردەكارییەك لەبارەی بڕگەكانی ڕێككەوتنە چاوەڕوانكراوەكە لەلایەن ڕۆیتەرزەوە بڵاونەكراوەتەوە و ئیسرائیلیش لەو باریەوە هیچ زانیارییەكی بڵاونەكردووەتەوە.
كەرتی غەززە كە چەند ساڵێكە گەمارۆدراوە، لەو دەمەی بزوتنەوەی حەماس ئۆپەراسیۆنی “گەردەلولی ئەقسا”ی دەستپێكرد، ڕووبەڕووی بۆردومانێكی چڕبووەتەوە و هەزاران كەس بەو هۆیەوە بوونەتە قوربانی و بەگوێرەی دوایین ئامارەکان تا ئێستا ١٣ هەزار و ٥٠٠ کەس لە غەززە گیانیان لەدەستداوە کە زۆرینەیان ژن و منداڵن.
