كەشناسێكی عێراقی ڕایدەگەیەنێتن، ڕەنگە شەپۆلی داهاتووی بارانبارین لە عێراق بەجۆرێك بێت، كە بۆ ماوەی پێنج ڕۆژ بەردەوام بێت و لە چەندین ناوچە دەوامی خوێندنگەكان و فەرمانگەكان پەكبخات.
ڕیاز ئەلقورەیشی، شارەزای كەشناسی عێراقی لە چاوپێکەوتنێکیدا لەگەڵ (بغداد الیوم) ڕایگەیاند، “شێی زوو و کاریگەری شێی گەرم و جوڵەی جەت ستریم دەستیکردووە بە کاریگەربوون، هەربۆیە ئەگەری زۆرە لە ئێوارەی سبەی سێ شەممەوە شەپۆلی بارانبارین دەستپێبکات، چونکە قۆناغەکانی یەکەمی لە بیابانی سەماوە دەبێت، دواتر دەچێتە موسەننا بە گشتی و دواتر بیابانی نەجەفیش دەگرێتەوە، هەروەها ناوچەکانی هەرێمی كوردستان بە گشتی لە ڕۆژی چوار شەممەوە دەیانگرێتەوە”.
ڕاشیگەیاندووە، ناوچەکانی ڕۆژهەڵاتی عێراق بەتایبەتی میسان و واست و ناوچەکانی نزیک لە کەرتی سنووری عێراق و ئێران بەختەوەرتر دەبن لە ڕووی بارانبارینی بەخوڕەوە و دەبێتە هۆی دروستبوونی لافاو، بەتایبەتی لە ناوچەکانی ئەلکەلال و گوندەکانی نزیک سنوور، لە کاتێکدا ڕێژەی لافاو لە هەندێک ناوچە کەمتر دەبێتەوە، بەڵام بە شێوەیەکی گشتی، بەسرە پشکی خۆی بەدەست دەهێنێت، جگە لە ناوچەکانی ناوەڕاستی فوڕات، تا دەگات بە پایتەخت.
ڕوونیشیکردەوە، “ڕەنگە بارانبارین تا كاتژمێرەكانی سەرەتای ڕۆژی شەممە بەردەوام بێت، واتە شەپۆلی داهاتووی بارانبارین بۆ ماوەی پێنج ڕۆژ بەردەوام دەبێت و لە هەندێک ناوچەدا پەرشوبڵاو و پچڕ پچڕ دەبێت، بەڵام زۆرییەکەی لە ناوچەکانی ڕۆژهەڵاتی عێراق تا ڕادەیەکی زۆر چڕ دەبێتەوە، بەتایبەتی لە واست و میسان”.
ئەلقورەیشی ئاماژەی بە “پێویستی وریایی لەسەر ڕێگا سەرەکییەکان بە تایبەتی لەگەڵ دەستپێکردنی شەپۆلی بارانبارین، جگە لە ناوچەکانی نزیک لێوارەکان و ناوچەکانی لێشاوی لافاو، کە دەبێت گرنگییان پێبدرێت”.
ئاماژەی بەوەشکرد، “بارانبارینی بەخوڕ ڕەنگە ببێتە هۆی پەکخستنی دەوام لە هەندێک ناوچەدا، بەتایبەتی لەگەڵ لاوازی خزمەتگوزارییەکان كە دەبنە هۆی ئەوەی بەرگەی بەشێكی زۆری ئەو لافاوە نەگرن.
وتیشی، “ئەم بابەتە پەیوەستە بە پێشهاتەکانی سەر زەوی، بەتایبەتی کە مامەڵە لەگەڵ گۆڕانی خێرای بارودۆخی کەشوهەوادا دەکەین، هەربۆیە بارانبارین لە ڕۆژهەڵاتی عێراق زۆر بەهێز دەبێت”.
