ئەندامێکی پەرلەمانی عێڕاق وادەی چارەسەربوونی گرفتی مووچە ئاشکرا دەکات و دەڵێت” ئەگەر مووچەی مانگی شوبات بەبێ كێشە بۆ هەرێم بنێردرێت ئەمساڵ گرفتی مووچە نامینێت”.
كاروان یاروەیس بڕیاردەری فراكسیۆنی یەكێتی لەپەرلەمانی عێراق بە سایتی یەکیتی ڕاگەیاندووە، چاوەڕواندەكرێت لەم هەفتەیەدا بەغدا مووچەی مانگی شوباتی مووچەخۆرانی هەرێم بنێرێت، دواكەوتنیشی پەیوەندی بەوەوە هەیە كەیەكەم مانگە لەدوای رێككەوتنی هەردوولا مووچە بۆ هەرێم بنێردرێت.
ئاماژەی بەوەشداوە ئەگەر مووچەی مانگی شوبات بەبێ كێشە بۆ هەرێم بنێردرێت، بۆ مانگەكانی ئایندە تا كۆتایی ساڵ هیچ گرفتێك بۆ مووچە دروستنابێت.
ئەمە لەکاتێکدایە هەر ئەمرۆ میدیای یەکێتی لەزاری سەرچاوەیەکەوە بڵاویکردبووەوە، “پێناچێت لە دوو ڕۆژی داهاتووشدا مووچەی هەرێم ڕەوانە بكرێت”.
نزیکەی هەفتەیەک دەبێت حکومەتی هەرێم لیستی مووچەی مانگی دووی ڕەوانەی بەغدا کردووە، بەڵام تا ئەم ساتە وردبینی لیستی مووچە و میزان مراجعە کۆتایینەهاتووە و مووچەخۆرانی هەرێم چاوەڕێی مووچەی مانگی 2 دەکەن، و چارەنووسی مووچەی مانگی 12 بەنادیاری ماوەتەوە.
وەزارەتی دارایی عیراق بۆ دابەشكردنی مووچەی مانگی یەك بڕی 958 ملیار و 12 ملیۆن و 332 هەزار و 759 دیناری بۆ هەرێم نارد، كە چاوەڕواندەكرێت ئەو بڕە پارەیە جێگیربكرێت بۆ هەر 12 مانگەكەی ئەمساڵی مووچەخۆرانی هەرێم.
