دابەشكردنی مووچەی مانگی شوبات-ی مووچەخۆرانی هەرێم زیاتر دوادەكەوێت و سەرچاوەیەك لە وەزارەتی دارایی عێراق دەڵێت: هێشتا وردبینی لە لیستی مووچەی مووچەخۆرانی هەرێم تەواو نەبووە.
میدیاكانی یەكێتی لەزاری سەرچاوەیەكی وەزارەتی دارایی عێراق بڵاویانكردەوە، شاندێكی وەزارەتی دارایی هەرێم لە بەغدان و لەگەڵ تەیف سامی، وەزیری دارایی عێراق لەبارەی مووچەوە كۆبوونەتەوە.
وتیشی، “پێناچێت لە دوو ڕۆژی داهاتووشدا مووچەی هەرێم ڕەوانە بكرێت”.
پێنج ڕۆژ لەمەوبەر، وەزارەتی دارایی هەرێم ڕایگەیاند، لیستی مووچەی مانگی شوبات-ی مووچەخۆرانی هەرێم بە سیستمی پایڕۆڵ ڕەوانەی بەغدا كراوە.
لای خۆشیەوە، سیپان شێروانی، ئه‌ندامی لیژنەی ئابووری په‌رله‌مانی عێراق بە میدیای پارتی وتووە، “مووچەی مانگی شوبات، هیچ بەربەستێكی لەپێشدا نییە و لە زووترین كاتدا بۆ هەرێمی كوردستان دەنێردرێت”.
ئاماژەی بەوەشكردووە، هەموو شتێك وەك پێویست بەرەوپێش چووە و وردبینیی لیستی مووچە گەیشتووەتە قۆناغی كۆتایی.
