میدیاکانی پاکستان ڕۆژی دووشەممە بڵاویان کردەوە کە لە دەروازەی سنووری تۆرخام پێکدادانی چەکداری لە نێوان هێزەکانی ئەفغانستان و پاکستان ڕوویداوە، دوای شکستی دانوستانەکانی نێوان هەردوو وڵات سەبارەت بە کردنەوەی دەروازەکە کە بۆ دەیەمین ڕۆژی لەسەریەک داخراوە.
کەناڵی ئەلمەشرەقی پاکستانی ڕایگەیاندووە کە “لە دەروازەی تۆرخام پێکدادانێکی توند لە نێوان هێزەکانی پاکستان و ئەفغانستان ڕوویداوە و لە ئەنجامدا زیانی گیانی لە هەردوو لا کەوتۆتەوە”.
کەناڵەکە ڕوونیشیکردووەتەوە، سێ پاسەوانی سنووری پاکستانی برینداربوون، جگە لە دانیشتوویەکی ناوچەکە، هەروەها ماڵەکانی ئەو ناوچەیەش زیانیان بەرکەوتووە بەهۆی تەقەی نێوان ئەو دوو لایەنە و گوللە هاوەنەکان کە لەلایەن هێزەکانی ئەفغانستانەوە تەقێنراون.
بە وتەی لایەنی پاکستانی، شەڕ و پێکدادانەکان بەهۆی هەوڵەکانی هێزەکانی ئەفغانستان بۆ دروستکردنی خاڵێکی پشکنین لە ناو ناوچەیەکی جێناکۆک لە نزیک دەروازەی تۆرخام سەریهەڵداوە، کە سوپای پاکستان ناڕەزایی دەربڕی بەرامبەر بە پرۆسەی بیناسازی، ئەمەش بووەتە هۆی دروستبوونی گرژی لەنێوان هەردوولا.
شەفقات عەلی خان، وتەبێژی وەزارەتی دەرەوەی پاکستان دەڵێت، کێشەی بنەڕەتی ئەوەیە کە لایەنی ئەفغانی بە شێوەیەکی تاکلایەنە لە هەوڵی دروستکردنی بنکەیەکی سنووریدایە لای ئێمە و ئێمە بانگهێشتمان کردوون بۆ چارەسەرکردنی ئەو جۆرە کێشانە لە ڕێگەی میکانیزمێکی دوولایەنە.
دەروازەی سنووری تۆرخام بە گرنگترین و دیارترین دەروازەی هاوبەشی نێوان پاکستان و ئەفغانستان دادەنرێت، کە دەکەوێتە سەر سنووری هاوبەشی نێوان هەردوو وڵات لە پارێزگای خەیبەر پختونخوای پاکستان و پارێزگای نەنگەرهار لە ئەفغانستان، داخستنی زیانێکی زۆری بە بازرگانان گەیاندووە و کاریگەری لەسەر هاتووچۆ هەبووە کە لە نێوان هەردوو وڵاتدا ئەنجام دەدرێت.
