لە سلێمانی دەست بەسەر نزیکەی پێنج تۆن جگەری بەستوودا گیرا کە هاوردەکردنی قەدەغەیە و سەرۆکی لیژنە هاوبەشەکانیش داوا دەکات لە دەروازە سنوورییەکان پشکنین بۆ خۆراکە هاوردەکراوەکان بکرێت.
ئەمڕۆ دووشەممە، گۆران قادر، سەرۆکی لیژنە هاوبەشەکانی قائیمقامیەتی سلێمانی ڕایگەیاند، دەستیان بەسەر 250 کارتۆن جگەری بەستووی هاوردەکراودا گرت کە دەکاتە نزیکەی پێنج تۆن.
جەختیشیکردەوە کە هاتنە ناوەوەی جگەری بەستوو قەدەغەیە و ڕێ پێنەدراوە.
سەبارەت بە هۆکاری دووبارەبوونەوەی گەیشتنی گوشت و خۆراکی خراپ و بەسەرچوو بە بازاڕەکان، گۆران قادر ڕایگەیاند، پێویستە ئەو خۆراکانە لە خاڵە سنوورییەکاندا پشکنینیان بۆ بکرێت و دواتریش پێویستە بە شێوازێکی گونجاو بگوازرێنەوە و هەڵبگیرێن.
دوێنێش لیژنەکانی قائیمقامیەت دەستیان بەسەر 60 تۆن گۆشتی بەسەرچوودا گرت و بڕیارە لەگەڵ جگەرە بەستووەکەدا لەناوببرێن.
