زانیاری نوێ دەربارەی پەیوەندییە تەلەفۆنییەکەی دەوڵەت باخچەلی بۆ سەڵاحەدین دەمیرتاش ئاشکرا دەبێت کە بەمەبەستی ئامادەبوون لە نەشتەرگەریی باشاکی هاوسەری، لە گرتووخانە دەرکراوە.
ئەمڕۆ دووشەممە، یڵدرای ئۆغور، نووسەری ڕۆژنامەی “قەرار”ی تورکی وردەکاری پەیوەندییە تەلەفۆنییەکەی دەوڵەت باخچەلی، سەرۆکی گشتی بزووتنەوەی نەتەوەپەرستی مەهەپەی لەگەڵ سەڵاحەدین دەمیرتاش، هاوسەرۆکی پێشووی هەدەپە ئاشکرا کرد کە لە چەند ڕۆژی ڕابردوودا ئەنجامدراوە.
یڵدرای ئۆغور لێدوانەکەی دوێنێی ڕۆژنامەنووس ناگەهان ئاڵچی، پشتڕاستکردەوە کە یەکەم کەس بوو هەواڵی پەیوەندییە تەلەفۆنییەکەی ئاشکرا کرد، بەڵام ئۆغور دەڵێت کاتی پەیوەندییەکە، دەمیرتاش لە زیندان نەبووە و وردەکارییەکەی بەم شێوەیە بووە:
ڕۆژی 28ی شوبات باشاک دەمیرتاش، هاوسەری سەڵاحەدین دەمیرتاش لە نەخۆشخانە نەشتەرگەریی بۆکراوە، بەر لەوەش سەڵاحەدین لە ڕێی وەزارەتی دادی تورکیاوە داوایکردووە کە ڕێی بدەن ڕۆژی نەشتەرگەرییەکە لەگەڵ هاوسەرەکەی ئامادە بێت.
ئەم داوایەی دەمیرتاش دەگاتەوە بە ڕەجەب تەیب ئەردۆغان، سەرۆک کۆماری تورکیا و ئەویش ڕەزامەندیی لەسەر دەرچوونی دەمیرتاش لە زیندان دەردەبڕیت بۆ ئەوەی لە نەخۆشخانەیەکی ئیستانبوڵ لەگەڵ هاوسەرەکەی بێت.
لە کاتێکدا دەمیرتاش لە نەخۆشخانە دەبێت، دەوڵەت باخچەلی، سەرۆکی مەهەپە پەیوەندی پێوە دەکات بۆ هەواڵپرسینی باشاکی هاوسەری.
بەرپرسانی مەهەپە دەڵێن پەیوندییەکە زۆر ئەرێنی بووە و باخچەلی سوپاسی هەڵوێستی دەمیرتاشی کردووە کە لە پەیامەکەی ئەمدواییەیدا پشتیوانی بۆ پرۆسەی ئاشتی دەبڕیوە و هیوای لەشساغی و تەمەندرێژی بۆ ئەردۆغان و باخچەلی و ئۆجالان خواستووە.
یڵدرای ئۆغور لە وتارەکەیدا ڕاشیگەیاندووە پیدەچێت ئەم ئاماژانە ڕێخۆشکەر بن بۆ ئەوەی لە داهاتوودا دەمیرتاش ئازادبکرێت هەروەک لە بڕیارەکانی دادگای ئەوروپادا هاتووە.
