سەرۆکایەتی شارەوانی سلێمانی ڕایگەیاند، چەند کەسێک بەناوی بەشی زیادەڕەوی سەرۆکایەتیی شارەوانییەوە داوای پارەیان لە هاووڵاتییان کردووە.
ئەمشەو سەرۆکایەتی شارەوانی سلێمانی ڕایگەیاند، لە بینای سەرۆکایەتیی شارەوانیی سلێمانی بە ئامادەبوونی بەشەکانی زیادەڕەوی و یاسا و بەشە پەیوەندیدارەکان دەرکەوت بەناوی بەشی زیادەڕەوی سەرۆکایەتیی شارەوانییەوە چەند کەسێک داوای پارەیان لە هاوڵاتییان كردووه.
لە ڕاگەیەندراوکەدا هاتووە: “لێرەوە ئاگاداری هاووڵاتییانی خۆشەویست دەکەین كە ئەو بابەتە هیچ پەیوەندییەکی بە شارەوانیی سلێمانییەوە نییە و لەکاتی ڕوودانی هەر حاڵەتێکی لەم جۆرە دەستبەجێ بەشی یاسای سەرۆکایەتیی شارەوانیی سلێمانی یاخود نزیکترین بنکەی پۆلیسی لێ ئاگادار بکەنەوە، بۆ مەبەستی گرتنەبەری ڕێکاری یاسایی لەگەڵ ئەو جۆرە کەسانە کە تاوانی لەو جۆرە ئەنجام دەدەن”.
هەر ئەمڕۆ سەرۆکایەتی شارەوانی سلێمانی لە ڕاگەیەندراوێکی دیکەدا هاووڵاتییانی ئاگادارکردەوە لە بەرتیل و ڕایگەیاند، “ئەگەر هەر فەرمانبەرێکی شارەوانی لە هەر پلەیەکدا بێت داوای پارەی لێ کردن ئەوا دەستبەجێ سەرۆکی شارەوانی یان بەشی کاروباری یاسایى شارەوانیمانی لێ ئاگاداربکەنەوە یاخود لە نزیکترین بنکەی پۆلیس سکالای لەسەر تۆماربکەن و دڵنیابن لەوەی دەست لە هیچ کەسێک ناپارێزرێت و هەر کەسێک بێت بە سزای خۆی دەگات”.
