دەستەی كەشناسی عێراق وادەی شەپۆڵێكی دیكەی بارانبارینی ڕاگەیاند و پێشبینی كرد بۆ ماوەی چەند ڕۆژێك بەردەوام بێت و شارەزایەكی كەشناسی دەڵێت: لەگەڵ چالاکبوونی ھەورە بەھاریەکان کە ھەورە بروسکە و تاوە تەرزە و بارانی بەخوریان لەگەڵدایە.
دەستەی كەشناسی عێراق بڵاویكردەوە، شەپۆڵێكی بارانبارینی بەهارە بەڕێوەیە و لە هەندێك شوێن ڕەشەبا و هەورەبروسكەشی لەگەڵدا دەبێت، كە لە ڕۆژی سێ شەممە دەست پێ دەكات تا ڕۆژی یەك شەممەی هەفتەی داهاتوو بەردەوامی دەبێت.
لای خۆشیەوە، شاڵاو هیدایەت، شارەزای كەشناسی بۆ (خەڵك) ڕایگەیاند، لە ڕۆژی سێ شەممەوە 4/3/2025 بەھۆی نزیکبوونەوەی نزمە پاڵەپەستۆی گەرمی باکوری ئەفریقا، کە لە دەریای سوورەوە دێت پلەکانی گەرما بەرێژەیەکی زیاتر لەسەرجەم ناوچەکانمان بەرز ئەبێتەوە کەشێکی فێنک و بەھاریانە ناوچەکە دەگرێتەوە .
ڕاشیگەیاند، لەکۆتایی ئەم ھەفتەوە ڕۆژی چوار شەممە 5/3/2025 کاریگەری نزمە پاڵەستۆکەی دەریای سوور زیاتر پەرەئەسەنێت و فراوان ئەبێت بۆ سەر ناوچەکانی باکوری سعودیە و عێراق و ھەرێمی کوردستان و حاڵەتێکی ناجێگیری کەش لە بەرگەھەوای تەواوی ئەو ناوچانەدا ڕووئەدات و تا سەرەتای ھەفتەی داھاتوو ڕۆژی شەممە 8/3/2025 بەردەوامی ئەبێت.
وتیشی، “لەو ماوەیەدا لەناوچە جیاجیاکان ئاسمان بە زۆری ئەگۆڕێ بۆ نیمچە ھەور و ھەوری تەواو لەگەڵ چالاکبوونی ھەورە بەھارییەکان کە ھەورە بروسکە و تاوە تەرزە و بارانی بەخوڕیان لەگەڵدایە بۆ سەرتاسەری ناوچەکانی عێراق و کوردستان بەڕێژە و بڕی جیاواز بەتایبەتیش لەناوچەکانی سنووری پارێزگای سلێمانی و ھەڵەبجە و کەرکوک و ئیدارەی گەرمیان و ڕاپەڕین و پارێزگای ئەنبار بە رێژەیەکی زیاتر ئەگەری باران و تەرزە و ھەورە بروسکەی بەھێزیان ئەبێت لەگەڵ بەرزبوونەوەی ئاستی ئاو و لافاو لەھەندێ شوێندا”.
ئاماژەی بەوەشكرد، ناوچەکانی پارێزگای دھۆک و ھەولێر و نەینەواش ئەگرێتەوە بەتایبەت ئەو ناوچانە زیاتر لەژێر کاریگەری نزمە پاڵەپەستۆی دووھەمدا ئەبن، کە لە دەریای ناوەڕاستەوە دێت بەراورد بە ناوچەکانی پێشتر باران و ھەورە بروسکەیان ھەندێ کەمتر ئەبێت.
