لەنێو منداڵان لە دهۆک ڤایرۆسێک بڵاوبۆتەوە و بەڕێوەبەری نەخۆشخانەی هێڤیی منداڵانیش دەڵێت” نەخۆشخانەی هێڤیی منداڵان پڕ بووە لە نەخۆش و بەشێکیان مەترسی لەسەر ژیانیان هەیە”.
د. نزار بەکر، بەڕێوەبەری نەخۆشخانەی هێڤیی منداڵان لە دهۆک بەمیدیای پارتی ڕاگەیاندووە، ئەو ڤایرۆسەی بڵاوبۆتەوە ڤایرۆسی RSVـیە کە وەرزییە و بۆ بەشیک لە منداڵان جێگەی نیگەرانییە و هەندێکیان لەژێر ئۆکسجیندان و تاوەکو ئێستا چارەسەرێکی دیاریکراوی نییە.
ئاماژەی بەوەشداوە، منداڵی خوار دوو ساڵ مەترسیی لەسەر ژیانیان زۆرە بۆیە بەوردی چاودێری دەکرێن، و داواشدەکەین دایکان شیری خۆیان بدەن بە منداڵەکان بۆئەوەی بەرگری جەستەیان بەهێزبێت بەرامبەر بە لێکەوتەکانی.
بەپێی ئامارەکانی نەخۆشخانەکە، تەنیا مانگی رابردوو 15 هەزار نەخۆش تۆمارکراون کە 80٪ـیان تووشبووی ڤایرۆسی RSV بوون کە لەو رێژەیەش زیاتر لە 100 نەخۆشیان خەوێندراون.
ڤایرۆسی (RSV) یەکێکە لە ڤایرۆسە باوەکانی رێڕەوی هەناسە کە منداڵ تووشی هەوکردنی بۆڕیچکەکانی هەوا دەکات کە بە عەرەبی پێی دەگوترێت ”التهاب قصبات”، و بەهۆی ڤایرۆسی RSV ساڵانە زیاتر لە 100 هەزار منداڵ لە جیهان گیانلەدەستدەدەن و ژمارەیەکی ئێجگار زۆریش لە نەخۆشخانەکان دەخەوێنرێن تاوەکو ئۆکسجین و چارەسەری پێویستیان بۆ بکرێت.
ئەم ڤایرۆسە مەترسی لەسەر منداڵانی تەمەن زۆر بچووک و ناکام و تووشبووانی نەخۆشییەکانی دڵ و لوولەکانی خوێن
تووشبووانی نەخۆشییەکانی سینگ و ئەوانەی بەرگریی جەستەیان لاوازە دروستدەکات و لە کەسێکەوە بۆ کەسێکی دیکە بەخێرایی دەگوازرێتەوە، بەتایبەتی لەڕێگەی کۆکین، پژمین و دەستلێدان لەو شوێنانەی کە ڤایرۆسەکەی پێوەیە.
