شارەزایەکی ئابوری هۆکاری دابەزینی بەهای دۆلار ئاشکرا دەکات و دەڵێت”ئەم دابەزینە کاتییە و دواتر بەرزدەبێتەوە بۆ 150 هەزار دینار”.
ناسر ئەلتەمیمی شارەزای ئابووری لەبارەی دابەزینی بەردەوامی نرخی دۆلار لە بازاڕدا، بە میدیا عێراقییەکانی ڕاگەیاندووە، دابەزینی نرخی دۆلار لە بازاڕە ناوخۆییەکان بۆ ماوەیەکی کاتییە، ئەمەش دەگەڕێتەوە بۆ کەمی خواست لەسەری بەهۆی مانگی ڕەمەزانەوە، ئەمەش پەیوەندی بە کەمی ئاڵوگۆری دۆلارەوە هەیە بەتایبەت لەبواری خانوبەرە و کڕینی ئۆتۆمبێل، و چەند بابەتێکی دیکە کە بە دۆلار دەفرۆشرێن.
ڕوونیشیکردەوە، ئەم دابەزینە کاتییە و سەرلەنوێ بەرزدەبێتەوە، بەتایبەتی لەگەڵ نزیکبوونەوەی جەژنی ڕەمەزان، و پاشان دەگەڕێتەوە بۆ پێگەی خۆی لەنێوان (150، 151) بۆ هەر 100 دۆلارێک”.
تەمیمی ڕاشیگەیاند، ئەم دابەزینە لە ئەنجامی چارەسەری ڕاستەقینە بۆ ئەم قەیرانە نەهاتووە، کە ماوەیەکی زۆرە بەردەوامە بەڵکو هۆکاری ڕاستەقینە نەبوونی خواستە لەسەری لەم ڕۆژانەدا.
ئەمڕۆ یەکشەممە نرخی دۆلار لە بۆرسەی ناوخۆییدا بەردەوام بوو لە دابەزین و بۆ یەکەمجار لە ماوەی چەند مانگێکدا بۆ ئاستێکی پێوانەیی دابەزی و یەکشەممە نرخی دۆلار گەیشتە 146 هەزار و 800 دینار بۆ 100 دۆلار و لەکاتی داخستنی بازاڕ بووە 147 هەزار و 750 دینار.
