سەرۆكی پارتی سۆسیال دیموكراتی كوردستان ڕایدەگەیەنێت، كێشەیان لەگەڵ كەس نییە و دەشڵێت: توركیا ژیرانە بیربكاتەوە ئۆجەلان ئازاد دەكات و بۆ نەورۆز دەیباتە دیاربەكر.
ماوەی چەند ڕۆژێكە پارتی سۆسیال دیموكرات و چەند حزبێكی ئیسلامی یەكتری تۆمەتبار دەكەن بە وەرگرتنی پارە لە حكومەت و پەیوەندییان بە ڕژێمی ڕووخاوی بەعسەوە و ئەوەش بە خراپی پەیوەندی نێوان ئەو حزبانە وەسف دەكرێت.
محەمەد حاجی مەحمود، سەرۆكی پارتی سۆسیال دیموكراتی كوردستان بۆ ڕۆژنامەنووسان ڕایگەیاند، كێشەمان لەگەڵ هیچ كەسێك نییە و لەگەڵ هەموو لایەنەكان پەیوەنیمان زۆر باشە.
ڕاشیگەیاند، لەماوەیەكی كەمدا یەكێتی و پارتی بۆ پێكهێنانی حكومەت دەگەنە ڕێككەوتن .
دەربارەی پڕۆسەی ئاشتی لە توركیا وتی، “هەنگاوێكی گرنگە و باشە و ئێستا كورد لە توركیا و سوریا و هەرێمی كوردستان زۆر بەهێزە بەپێچەوانەی دەوڵەتەكانیانەوە”.
ئاماژەی بەوەشكرد، هەر پارچەیەكی كوردستان كاریگەری لەسەر پارچەكانی دیكە دەبێت و چاوەڕوان كراوە جارێكی دیكە ئۆجەلان بگەڕێتەوە، چونكە دیداری بەردەوام هەبووە و ئومێدەوارین توركیا ژیرانە بیربكاتەوە و ئۆجەلان ئازاد بكات و ڕۆژی نەورۆز بیباتە دیاربەكر.
