سەرۆک کۆماری ئێران رەخنە لەپەرلەمانی وڵاتەکەی دەگرێت و دەڵێت” پارەکانمان لە قەتەر، عێراق و تورکیا بلۆککراوە و ناماندەنەوە، قورساییەکە مەخەنە سەر کەسێک”
مەسعود پزیشکیان، سەرۆککۆماری ئێران ئەمڕۆ یەکشەمە لەناو پەرلەمانی وڵاتەکەی بە توڕەییەوە قسەی کرد و وتی، کێشە ئابوورییەکانی ئەمڕۆی کۆمەڵگا پەیوەندییان بە یەک کەسەوە نییە، و ناتوانین هەموو تاوانەکە بخەینە ئەستۆی یەک کەس، و دوژمن دەیەوێت حکومەت و پەرلەمانمان نەمێنێت، پارەکانمان لە قەتەر، عێراق و تورکیا بلۆککراوە و ناماندەنەوە.
پزیشکیان راشیگەیاند، تاوانبارکردنی یەکتر لەکاتێکدا لە حاڵەتی شەڕی ئابووریداین، کێشەکە چارەسەر ناکات، و ئێمە لە شەڕێکی ئابووریداین، ئەم شەڕە زۆر خراپتر و توندوتیژترە لە شەڕی سەپێنراوی 8 ساڵە لەگەڵ سەدام.
پزیشکیان روویکردە خەڵکی ئێران و وتی” داوای لێبوردن دەکەم ناچار بووین لە وەرزی زستاندا غازەکانتان ببڕین، ناچار بووین کارێک بکەین کە نەماندەویست بیکەین”.
پزیشکیان لەبارەی بریاری خامەنەیی نیگەرانە و دەڵێت”من باوەڕم وابوو کە دیالۆگمان هەبێت باشترە، ڕێبەری شۆڕش وتی کە ئێمە دیالۆگمان لەگەڵ ئەمریکادا نابێت، هەروەها ڕامگەیاند کە دیالۆگمان لەگەڵ ئەمریکادا نابێت. بەڵام دەبێت ڕێگای گونجاو بۆ چارەسەرکردنی کێشەکان بدۆزینەوە.
