وەزارەتی گواستنەوە گەیشتنی یەکەم کاروانی سیستەمی نێودەوڵەتی (TIR) بۆ عێڕاق ڕاگەیاند و دەشڵێت”ئەمە هەنگاوێکی مێژووییە لە ئاڵوگۆڕی بازرگانیدا لە عێڕاق”.
وەزارەتی گواستنەوە، ئەمڕۆ یەکشەممە 2ـی ئازاری 2025 ڕایگەیاند، پێشوازی لە یەکەم کاروانی تاقیکاری لە ڕێگەی سیستەمی نێودەوڵەتی (TIR) دەکەین بۆ عێڕاق، ئەم هەنگاوە بە هەماهەنگی لەگەڵ یەکێتی نێودەوڵەتی گواستنەوەی ڕێگاوبان (IRU) ئەنجامدراوە.
نووسینگەی ڕاگەیاندنی وەزارەتەکە ئاماژەی بەوەشکردووە، ئەمڕۆ یەکەم گەشتی تاقیکاریمان لە ڕێگەی سیستەمی (TIR)ەوە پێگەیشت کە لە بەندەری مێرسینی تورکیاوە لە ڕێگەی خاکی عێراقەوە ڕۆیشتووە، کە ڕێکارەکانی چوونە ژوورەوەی لە مەرزی ئیبراهیم خەلیل وەرگیراون، و بەرەو بەندەری ئوم قەسر ڕۆیشتووە، و دوا گۆشەی کاروانەکەش بەندەری خەلیفە دەبێت لە ئەبوزەبی”.
جەختیشی کردەوە، کە عێراق نزیکە لە بەدەستهێنانی دەستکەوتێکی مێژوویی لە بازرگانی نێوان سنوورەکاندا، و چاوەڕوان دەکرێت بەم نزیکانە کارەکانی گواستنەوە لە ژێر چەتری سیستمی گواستنەوەی وشکانی نێودەوڵەتی فراوانتربن، چونکە ئەم ڕووداوە نوێنەرایەتی خاڵی وەرچەرخانە بۆ وڵاتەکە و هەنگاوێکی گەورەیە بۆ تێکەڵبوونی تەواو بە سیستەمی نێودەوڵەتی دانپێدانراو بۆ ترانزێتی گومرگی.
TIR سیستەمێکی ترانزێتی گومرگی نێودەوڵەتییە کە ڕێگە دەدات کاڵاکان لە وڵاتی ڕەسەنەوە بۆ وڵاتی مەبەست لەناو کۆنتێنەری بارکردندا بگوازرێنەوە کە کۆنترۆڵی گومرگییان هەیە.
سیستەمی TIR لە ئاستی جیهانیدا جێبەجێ دەکرێت و گەرەنتییەکی نێودەوڵەتی یەکسان بەکاردەهێنێت، بەم شێوەیە پێویستی بە گەرەنتی تێچووی زۆر لە هەر وڵاتێکی ترانزێتدا نامێنێت.
