حكومەتی عیراق بڕی 100 هەزار دینار وەك بژێوی بە خانەنشینانی عیراق دەدات و پەرلەمانتارێكی كورد لە بەغدا ئاشكرای دەكات، داوای خەرجكردنی ئەو بڕە پارەیە بۆ خانەنشینانی هەرێم دەكات.
د. نەرمین مەعروف، ئەندامی لیژنەی دارایی پەرلەمانی عیراق بە ماڵپەڕی فەرمی حزبەكەی ڕاگەیاندووە، “بەنووسراوی فەرمی داوام لە محەمەد شیاع سودانی، سەرۆك وەزیرانی عیراق كرد بڕیاری خەرجكردنی 100 هەزار دینار بەناوی باشتركردنی بژێوییەوە، كەساڵی 2023 بۆ خانەنشینانی عیراق دەركرا، خانەنشینانی هەرێمیش بگرێتەوە، چونكە ئەوانیش خەڵكی عیراقن”.
ڕاشیگەیاندووە، “لەكاتێكدا حكومەتی هەرێم لەمانگی 7ی ساڵی 2024 ەوە ئەو بڕە پارەیەی بۆ خانەنشینانی هەرێم خەرجكرد، بەڵام دواتر لەمانگی 1ی ئەمساڵەوە، بڕیاری خەرجكردنی 100 هەزار دینار بەناوی باشتركردنی بژێویی بۆ خانەنشینان ڕاگرت، چونكە ئەو بڕیارە تەنها بۆ خانەنشینانی عیراق دەركراوە نەك خانەنشینانی هەرێم”.
ئاماژەی بەوەشكرد، “لەئێستادا چاوەڕوانی ڕەزامەندی سەرۆك وەزیران و وەزارەتی دارایی عیراقین بۆ دووبارە خەرجكردنەوەی ئەو بڕە پارەیە بۆ خانەنشینانی هەرێم، هاوكات پێمانوایە جێبەجێكردنی تەواوی یاساكە چەند مانگێكی پێبچێت”.
بەپێی دەقی یاسایی ئەو بڕیارەی، كە ساڵی 2023 بۆ خانەنشینانی عیراق دەركرا، بڕی ئەو پارەیەی بەناوی باشتركردنی بژێوییەوە بۆ خانەنشینان خەرجدەكرێت لەخانەنشینێكەوە بۆ خانەنشینێكی دیكە جیاوازە و بەگوێرەی بڕوانامە و ساڵانی خزمەت و وارسی شەهیدان و چەند تایبەتمەندییەكی دیكە دەگۆڕێت.
