کەشناسی هەرێم ڕایگەیاند، ئەمڕۆ ئاسمان ساماڵ و پەڵەهەور دەبێت، پلەکانی گەرماش بەرزتر دەبنەوە، هاوکات بەپێی ڕاپۆرتێکی فەرمانگەی کەشناسی سلێمانی، مانگی شوباتی ئەمساڵ ساردترینی مانگەکانی 30 ساڵی ڕابردوو بووە.
بەپێی ڕاپۆرتی کەشناسی هەرێم، ئەمڕۆ یەکشەممە، ئاسمان ساماڵ و پەڵە هەور دەبێت، پلەکانی گەرما بەرزدەبێتەوە بە یەک بۆ دوو پلەی سیلیزی بەراورد بە تۆمارکراوەکانى دوێنێ.
لە بارەی کەشوهەوای سبەینێ دووشەممە، کەشناسی هەرێم دەڵێت: ئاسمان ساماڵ و پەڵە هەور دەبێت، لە کاتەکانى دواى نیوەڕۆ دەگۆرێت بۆ نیمچە هەور.
ئەوەشی وتووە: پلەکانی گەرما بەگشتی بەرز دەبێتەوە بە یەک بۆ دوو پلەی سیلیزی بەراورد بە تۆمارکراوەکانی ئەمرۆ.
لەلایەکی دیکەوە فەرمانگەی کەشناسی سلێمانی بڵاویکردووەتەوە: بەپێی داتا تۆماركراوەكانی وێسگەی كەشناسی سلێمانی نزمترین پلەی گەرمی لە مانگی شوباتی ئەمساڵدا -5.5 پلەی سەدی و بەرزترین پلەی گەرمی 16.4 پلە بووە، هەروەها تێكڕای پلەی گەرمی لەم مانگەدا 5.5 پلەی سەدی بووە كە بەراورد بە تێكڕای پلەی گەرمی مانگی شوباتی 30 ساڵی ڕابردوو ئەمساڵ 2.9 پلە نزمتر بوو.
دەشڵێت: “بڕی بارانی ئەم مانگە 78،2 مليم بوو كە بەراورد بە تێكڕای بارینی مانگی شوباتی 30 ساڵی ڕابردوو نزیكەی 35 مليم كەمتر بووە”.
بەرزترین پلەکانی گەرمای پێشبینیکراو بە پلەی سیلیزی:
هەولێر: 16 پلەى سیلیزى
سلێمانی: 12 پلەى سیلیزى
دهۆک: 14 پلەى سیلیزى
کەرکوک: 17 پلەى سیلیزى
زاخۆ: 16 پلەى سیلیزى
هەڵەبجە: 12 پلەى سیلیزى
حاجی ئۆمەران: 2 پلەى سیلیزى
سۆران: 12 پلەى سیلیزى
گەرمیان: 18 پلەى سیلیزى
