تیمێکی تەکنیکی بۆ تەواوکردنی ڕێکارەکانی مووچەی مانگی دوو گەیشتە بەغداد، سەرچاوەیەکیش دەڵێت، 100 هەزارەکەی خانەنشینان لەگەڵ لیستی مووچەی مانگی شوبات زیاد کراوە، ئەگەر رەزامەندیی سەرۆک وەزیران هەبێت، خەرج دەکرێت.
میدیای پارتی لە زاری سەرچاوەیەکی وەزارەتی دارایی هەرێم بڵاویکردەوە: “تیمێکی تەکنیکی سەر بە وەزارەتی دارایی هەرێم گەڕانەوە بەغداد، بۆ تەواوکردنی ڕێکارەکانی تەمویلی مووچەی مانگی دوو”.
بە وتەی سەرچاوەکە، “تیمەکە لەگەڵ وەزارەتی دارایی فیدڕاڵ هەماهەنگی دەکەن و چەند نووسراوێکیش ئامادە کراوە”.
ئەو سەرچاوەیە باسی لەوەشکردووە: “نووسراوەکانی تەمویل حەوت جۆر نووسراون، خانەنشین بەتەنیایە و فەرمانبەری مەدنی و سەربازی بە جیا و چاودێریی کۆمەڵایەتییش بەتەنیا، هەمووی ئامادە کراوە”.
وەزارەتی دارایی و ئابووری هەرێم، ڕۆژی 26ی شوبات، لیستی مووچەی مانگی دووی ڕەوانەی بەغداد کرد و ڕۆژی دواتر لیستەکە ڕادەستی وەزارەتی دارایی فیدڕاڵ کرا.
سەرچاوەکەی وەزارەتی دارایی ئەوەشی ئاشکراشکردووە، “100 هەزارەکەی دەرماڵەی خانەنشینان لەگەڵ لیستی مووچەی مانگی شوبات هەیە”، وتیشی: “ماوەیەکە بە نووسراو داوای خەرجکردنی 100 هەزارەکەمان کردووە، لەگەڵ لیستی مووچەی مانگی شوبات زیاد کراوە، ئەگەر رەزامەندیی سەرۆک وەزیران هەبێت، خەرج دەکرێت، ئەگەر نا لێی دەردەهێنین”.
لای خۆیەوە شێروان دووبەردانی، ئەندامی فراكسیۆنی پارتی لە پەرلەمانی عێراق ڕایگەیاندووە، “لە وەزارەتی دارایی عێراقی فیدراڵ زانیاریمان وەرگرت، وردبینیی لیستی مووچە ڕێکارەکانی خۆی گرتووە و تەنیا ڕۆتیناتی ماوە”.
ئەو پەرلەمانتارە دەشڵێت: “پشتیوان بەخودا، لەم یەک دوو ڕۆژەدا تەمویلی مووچەی مانگی شوبات خەرج دەکرێت و دەنێردرێت”.
