ئەو وردە پلاستیکانەی تەنیا بە وردبین دەبیندرێن، بە هەموو شوێنێکدا بڵاوبوونەتەوە، هەر لە خانەکانی لەشی مرۆڤەوە بۆ هەموو شوێنێکی دیکە.
لێکۆڵینەوەیەکی نوێی زانکۆی سەربەخۆی بارسێلۆنای ئیسپانیا گەیشتووەتە ئەنجامێکی راچڵەکێنەر: یەک کیسە چای سەفەری، دەکرێت ملیاران وردە پلاستیک بخاتە نێو ئاوی گەرمەوە و لەو رێگەیەوە بچنە نێو لەشی مرۆڤەوە.
لێکۆڵینەوەکە دەڵێت، کاتێک کیسە چایەکە دەخرێتە نێو ئاوی گەرم، وردە پلاستیکەکان لە کیسە چایەکە جیادەبنەوە و لەگەڵ ئاوەکە دا تێکەڵ دەبن. کاتێک مرۆڤ چایەکە دەیخواتەوە، وردە پلاستیکەکان دەچنە نێو خانەکانی هەناوی مرۆڤەوە.
لێکۆڵەرەکان بۆیان دەرکەوتووە، ئەم وردە پلاستیکانە تەنانەت دەچنە نێو ناوکی خانەکانەوە و مەترسیی جۆراوجۆر بۆ سەر تەندروستیی مرۆڤ دروست دەکەن.
زانایان لە رێگەی لێکۆڵینەوەکەیانەوە تیشک دەخەنە سەر نەبوونی رێکاری پێویست بۆ تاقیکردنەوە و دڵنیابوون لە کوالێتیی ئەو پلاستیکەی بۆ داپۆشین و هەڵگرتنی خۆراک و خواردنەوەکان بەکاردەهێندرێن.
یەکێک لە راسپاردەکانی لێکۆڵینەوەکە ئەوەیە، دەبێت لێکۆڵینەوەی زیاتر لەسەر کاریگەریی هەرسکردنی وردە پلاستیکەکان بکرێت و رێکاری زیاتر بگیرێتە بەر بۆ ئەوەی خواردن و خواردنەوەی مرۆڤ لەم تەنۆلکە ژەهراوییانە بپارێزرێت.
لێکۆڵەرەکان داوا لە بەکاربەران دەکەن ئاگاداری مەترسییەکانی کیسی پلاستیکی چای سەفەری بن و بیر لە بژاردەی دیکە بکەنەوە.
وردە پلاستیکەکان دەبنە هۆی نەخۆشی لە کۆئەندامی هەناسەدان، کۆئەندامی سووڕان (واتە دڵ و خوێنبەر و خوێنهێنەرەکان)، هەوکردنی ریخۆڵە و هەناو، تێکچوونی رژێنەکان و نەخۆشییەکانی دەمار و مێشک.
