لەگەڵ هاتنی یەکەم ڕۆژی ڕەمەزان، نرخی زۆرینەی خواردەمەنییەكان بەڕێژەیەكی بەرچاو گران كران لەكاتێكدا لیژنەكانی قائیمقامیەتی شار و شارۆچكەكان هۆشداری لە بەرزبوونەوەی نرخ دەدەن.
ئەمڕۆ یەكەم ڕۆژی ڕەمەزانی پیرۆز بوو، بەڵام ئەوەی تێبینی كرا، نرخی سەرجەم خواردن و خواردنەوەكان لە بازاڕدا لەسەر هاووڵاتیان گران كرا.
بەپێی بەدواداچوونی (خەڵك) نرخی كیلۆیەك خورمای وشكی ڕیشەدار، كە پێشتر بە 1500 دینار بوو كراوە بە 2 بۆ 2500 دینار و قتویەك خورمای نیو كیلۆیی لە 2 هەزار دینارەوە نرخەكەی بووە بە 3 هەزار دینار، هاوكات نرخی شەربەت و شیرینییەكان بەرزبوونەتەوە.
سەوزە و میوە فرۆشێك بە (خەڵك)ی ڕاگەیاند، “ئەمڕۆ نرخی كیلۆیەك تەماتە لە هەزار دینارەوە بەرزبۆتەوە بۆ 1500 دینار، چونكە لە عەلوە بە گرانتر كڕیومانە”.
هەروەها، فرۆشیارێکی مریشک وتی، “دوو ڕۆژ لەمەوبەر نرخی کیلۆیەک مریشک بە 2750 دینار بوو، بەڵام ئەمڕۆ لە یەکەم ڕۆژی مانگی ڕەمەزاندا، نرخەکە بۆ 3750 دینار بەرزبووەتەوە”.
وتیشی، “گران بوونی نرخی مریشك بەشێكی پەیوەستە بە زۆربوونی خواستی خەڵك بۆ ڕەمەزان و بەشێكیشی پەیوەستە بە ڕەوانەكردنی بۆ ناوەڕاست و خوارووی عێراق، بۆیە نرخەکان بەرزبوونەتەوە”.
