بەرپرسێکی وەزارەتی شارەوانی و گەشتوگوزاری هەرێمی کوردستان ڕایگەیاند، تاوەکو ئێستا زیاتر لە 240 هەزار فەرمانبەر ناویان بۆ وەرگرتنی زەوی پەسەندکراوە و تاوەکو کۆتایی پرۆسەکە زیاتر لە 400 هەزار فەرمانبەر و خانەنشین لە وەرگرتنی زەوی سوودمەند دەبن.
سەربەست مەولود، سەرۆکی لیژنەی وردبینیکردنی ناوی فەرمانبەران بۆ پێدانی زەوی لە وەزارەتی شارەوانی، ڕایگەیاندووە، “جگە لەو 240 هەزار فەرمانبەرە، ناوی فەرمانبەرانی وەزارەتی کشتوکاڵ و 18 هەزار خانەنشینیش بۆ ئەنجوومەنی وەزیران بەرزکراونەتەوە بۆ ئەوەی ڕەزامەندی وەربگیرێت تاوەکو زەوییان پێبدرێت”.
ڕاشیگەیاندووە، “تاوەکو ئیستا بەشێک لە خانەنشینان و بەشێک لە فەرمانگەکان بەهۆی ئەوەی کێشەیان هەبووە ناوەکانیان نەنێردراوە”.
وتیشی، “بەگوێرەی ئەو رووپێویەی کردوومانە تاوەکو کۆتایی پڕۆسەکە زیاتر لە 400 هەزار فەرمانبەر و خانەنشین ناویان بۆ پێدانی زەوی پەسەند دەکرێت”.
ساڵی ڕابردوو حکومەتی هەرێمی کوردستان بڕیاریدا بە پێدانی زەوی بە فەرمانبەران و ئەو خانەنشینانەی لە کاتی خزمەتی فەرمانبەرییان زەوییان پێنەدراوە.
