گولستان کڵچ، جێگری سەرۆکی فراکسیۆنی پارتی یەکسانی و دیموکراسی گەلان (دەم پارتی) لە پەرلەمانی تورکیا پێشوازی لە بڕیاری ئاگربەستی پەکەکە دەکات و داوا لە پەرلەمان دەکات ” هەنگاوی خێرا بنێت و بەرپرسیارێتی دۆخەکە بگرێتە ئەستۆ”.
بەرەبەیانی ئەمڕۆ شەممە، کۆمیتەی جێبەجێکاری پارتی کرێکارانی کوردستان هەڵوێستی خۆی بۆ دەمەوە چوونی پەیامەکەی ئۆجەلان دەربڕی ڕایگەیاند، لە ئەمڕۆوە ئاگربەستی شەڕ بەرانبەر بە تورکیا جێبەجێ دەکەن و پابەندی ناوەرۆکی پەیامەکەی ئۆجەلان دەبن.
گولستان کڵچ کۆچیغیت لە میانی بەشداربوونی لە بەرنامەی گەفتە سۆنۆی کەناڵی سەباحی تورکییەوە وتی: پەیامەکەی ئەمڕۆی پەکەکە بۆ بانگەوازەکەی ئۆجەلان هەنگاوێکی مێژووییە و وەک هەنگاوی یەکەم ئاگربەستیان ڕاگەیاند، ئەمەش ئاماژەیەکی ڕوون و ئاشکرایە کە بە خێرایی پەیامەکەی ئۆجەلان جێبەجێ دەکەن.
کڵچ ڕاشیگەیاندووە، هەرچەندە ئەم بانگەوازە لە بنەڕەتدا چەکداماڵین و هەڵوەشاندنەوەی پەکەکە لەخۆدەگرێت، بەڵام شتێکی دیکەش دەڵێت. کە بانگەوازێکە بۆ دیموکراسیکردنی دەوڵەت، بۆ ئەوەی دەوڵەت هەستیار بێت بەرامبەر بە دیموکراسی، بۆ ئەوەی دەوڵەت سیستەمێکی دیموکراسی دابمەزرێنێت کە هەموو گەلان و هەموو بیروباوەڕەکان و هەموو پێکهاتەکانی نیشتەجێی وڵات لەخۆ بگرێت.
کڵچ ڕاشیگەیاندووە، ئێستا کاتی هاتووە پەرلەمان بە گوێرەی ئەو دەسەڵات و بەرپرسیارێتییەی هەیەتی، بە ڕۆڵی ئەرێنی خۆی بۆ سەرخستنی پرۆسەکە هەڵسێت و هەنگاوی خێرا و پێویست بۆ جێبەجێکردنی پرۆسەکە و سەرخسینی ئاشتی بگرێتەبەر.
بەرەبەیانی ئەمڕۆ شەممە 1ی ئاداری 2025، کۆمیتەی جێبەجێکاری پارتی کرێکارانی کوردستان (پەکەکە) پابەندبوونی خۆی بە جێبەجێکردنی ناوەرۆکی پەیامەکەی عەبدوڵلا ئۆجەلان بۆ ئاگربەستی ڕاگەیاند و بۆ بەستنی کۆنگرەی خۆ هەڵوەشاندنەوەش داوای ئازادکردنی ئۆجەلان دەکەن بۆ ئەوەی سەرپەرشتی کۆنگرەکە بکات.
