ڕاوێژکارێکی سودانی ئاشکرای دەکات، کە بانکی ناوەندی عێراق بەرەو دەرکردنی دراوی ئەلیکترۆنی هەنگاو دەنێت.
مەزهەر محەمەد ساڵح، ڕاوێژکاری ئابووری محەمەد شیاع سودانی، سەرۆک وەزیرانی عێراق بە ئاژانسی هەواڵی (INA)ی ڕاگەیاندووە، بانکی ناوەندی بەرەو دەرکردنی دراوی ئەلیكترۆنی هەنگاو دەنێت وەک جێگره‌وه‌یه‌ك بۆ دراوی کاغەزی.
باسی لەوەشکردووە، “ئەم هەنگاوە سوودێکی زۆر بەدەست دەهێنێت، لەوانە کەمکردنەوەی دزەکردنی پارە، کەمکردنەوەی تێچووی چاپکردن، و سنووردارکردنی سووڕانەوەی دراوی کاغەزی لە دەرەوەی سیستەمی بانکی، ئەمە جگە لەوەی پێویستیی دووبارە چاپکردنی پارە کەم دەکاتەوە، کە ئەمەش تێچووی پەیوەندیدار بە بەرهەمهێنان و دابەشکردنی کەم دەکاتەوە”.
مەزهەر محەمەد ساڵح، ئەوەشی وتووە: جگە لەوەش بەرزکردنەوەی ئاستى شەفافیەت و کۆنترۆڵکردنی ڕەوتی دارایی و توانای بەدواداچوونی نەختینەیی دیجیتاڵی و ڕەوتی خەرجییەکان، هه‌روه‌ها پشتگیریکردنی هەوڵەکان بۆ بەرەنگاربوونەوەی سپیکردنەوەی پارە.
وتیشی: گواستنەوە بۆ دراوی دیجیتاڵی پێویستی بە ژێرخانی تەکنیکی بەهێز هەیە، لەوانە تۆڕەکانی ئینتەرنێتی متمانەپێکراو و پێشکەوتوو، سیستەمی پێشکەوتووی ئاسایشی ئەلیکترۆنی بۆ پاراستنی داتا و مامەڵەکان، هەروەها بەرەوپێشبردنی کلتووری قبوڵکردنی کۆمەڵایەتی دراوی دیجیتاڵی، دەستپێکردن لە دەزگاکانی حکومەتەوە، لەڕێگەی بەکارهێنانیانی له مامەڵە فەرمییەکان”.
