بارانبارین دەستپێدەکاتەوە و دەستەی کەشناسی عێراقیش دەڵێت، لە ناوەڕاستی هەفتە تا شەممەی داهاتوو بەردەوام دەبێت.
بەپێی ڕاگەیەندراوی دەستەی کەشناسی عێراق، شەپۆلێکی بەهێزی بارانبارین سەرجەم پارێزگاکانی عێراق دەگرێتەوە کە رۆژی سێشەممەی ئەم هەفتەیە دەستپێدەکات و تا رۆژی شەممەی داهاتوو بەردەوامدەبێت.
ڕاگەیەندراوەکە باسی لەوەشکردووە، “هۆشداری بە هاووڵاتییان دەدەین کە پێشبیندەکرێت شەپۆلەکە لافاویشی لەگەڵدا بێت”.
بەپێی پێشبینییەکانی کەشناسیی عێراق، زۆرترین بڕی باران لە ناوچەکانی باکوور و بەشەکانی ناوەڕاست و ڕۆژئاوا دەبارێت.
لەبارەی کەشوهەوای ئەمڕۆ شەممەوە کەشناسیی عێراق دەڵێت، ئاسمان لە زۆربەی ناوچەکان نیمچەهەور دەبێت و لە ناوچە بەرزەکانی باکوور (هەرێمی کوردستان) ئێوارەی ئەمڕۆ ئەگەری بەفربارین هەیە.
