عەبدولواحێد محەمەد ـ نووسەر
لە دوای ڕاگەیاندراوەکەی ڕێبەری زیندانیکراوی پارتی کرێکارانی کوردستان کە تیایدا وێڕای تیشک خستنەسەر دامەزراندن و خەباتی دوور و درێژ بزووتنەوە چەکداریەکەی و قوربانی بێشوماری داوای قۆناغێکیتری خەباتکردنی کرد، ئەویش بەستنی کۆنگرە و هەڵوەشانەوەی پارتەکەیی و بزاڤە چەکداریەکەی، ئیتر ئەوە بووە ترێند و ڕووپەڕی ڕۆژنامە و کەناڵەکانی ڕاگەیاندن و ماڵپەڕەکان و فەیسبووکی داپۆشی، هەر یەکە و بە پێی لێکدانەوەکەی خۆی.
دەکرێت هەموویان لە سێ خاڵدا کۆ بکرێتەوە:
١-هەندێکیان لەگەڵ ناوەڕۆکی پەیامەکە بوون بە باوەڕبوونیان بەوەی ئاپۆ شۆڕگێڕێکی بە ئەزموونە و بە ئاسانی هەڵناخەڵتێنرێت، دیارە خوێندنەوەی بۆ ئەو دیوی ڕاگەیاندراوەکەی پێیە کاتی خۆی دێت.
٢-هەنێکیتر شۆک بوون بەوەی، ڕژێمی تورکی چ شتێکی موقنیعی پێشکەش کردووە، تاوەکو جاڕی هەڵوەشانەوەی پەکەکە بدرێت، لەلایەن ڕێبەرە زیندانی کراوەکەی، ناهەقیشیان نییە چونکە ئەو ڕژێمە لە خراپە زیاتر بۆ کورد هیچیتری لە دەست نایێت.
٣-هەندێکیتریش پێیان وایە پەلە نەکرێت لە بڕیاردان، ئاپۆ و ئەو هەموو هاتن و چونەی وەفدی ئیمڕالی ، لەلایەک بۆ ئیمڕالی لەلایەکیتری بۆ باشووری کوردستان لە خۆڕا نییە، دیارە شتێک هەیە.
بەڕێزان بەندە لەگەڵ سێیەم بۆچوونم، بۆیە پێویستە ئارام بگرین لەسەر پەیامەکەی ئاپۆ و زوو نەکەوینە دۆخێک ڕەش و سپیمان لێ تێکەڵ بێت، ئەوەی ڕاگەیاندراوە بابەتێکی لە قوتوکراو نییە، بە پێی زانیاریەکان ماوەی یەک ساڵە تیمێکی ڕاسپێردراو لەلایەن دەسەڵاتدارانی تورکیاوە دوور لە چاوی کامێراوە لە نێوان ئەنقەرە و ئیمڕالیەوە لە هاتن و چوندان، دیارە ئەو پرسەش بە شەو و ڕۆژێک نیشاندراوەکانی دەرناکەون، ئەوەی هەیە سەرەتایەکە و هەنگاوی زۆری بە دواوەیە.
پێموایە لە ژێر سایەی سوڵتان و سوڵتانۆچکەکان هاتنە کایەی ئاشتی زۆر قورس و ئەستەمە، بەڵام بۆ باکووری کوردستان دەسپێکێکی زۆر گرنگ و ئەرێنیە، لەبەرئەوەی هەمووی کۆبکرێتەوە زیاتر لە سەدەیەکە خەبات لە پێناو مافە یاسایی و ئاساییەکانی خۆیان دەکەن، لە بەرامبەردا ماشێنی ڕاگەیاندنی زەبەلاحی داگیرکەران و دەوڵەتە سەردەستەکانی داشۆراو لە ئینسانیەت و بەرژەوەندخواز جارێک بە ناوی تێکدەر و کەڕەتێکیش لە ژێر ناوی تیرۆر کوردانی ئەو بەشە ئازیزەی کوردستانیان کردبووە بەحبوح و دەعبا.
لە ژێر ئەو ناو و ناتۆرە بێ بنەمایانە شەرعیەتیان بەوە دابوو، هەموو هێزیان بەکاربهێنن بۆ سڕینەوە و لەناوبردنیان، کەچی ئەوان خۆیان وەک مێخ ڕاگرت و چەقینەوە، ئەوە ڕەوشێکی تازەی هێناوەتە ئاراوە، وایکردووە کێشەی کورد لە نکۆڵی لێکردنەوە پێ بنێتە قۆناغێک، کە ڕای گشتی خەڵکی وڵاتەی بۆ دروست بێت، بۆیە دەبێت ئەو فورسەتە بقۆزرێتەوە، بڕوای تەواوم بەوە هەیە ئەوە وایکردووە هەلێک هەڵبکەوێت، نابێت کورد خۆی لێ نەبان بکات، بەرمەبنای ئەو هەلومەرجە، دەبێت نۆرەی کورد و ڕێبەرەکەی بێت بە هەموان بڵێت دەی ئەوەی پێتان کرا، کردتان، بەڵام ئێمە هەرماین وەکو فریز ڕەگمان ئەستورتر بوو.
سەرباری ئەوە ئێمە ئامادەین بۆ ئاشتی ئەمە عەرز و ئەمە گەز، هەر ئەوەشە ستراتیجەکەمان و دووەممان نییە، بەوە سوڵتان و ئەوانەی بەدەوریەوەن ئەگەر نەیکەن ئەوە خۆیان ئۆباڵەکە هەڵدەگرن، کوردیش ئەو ناو و ناتۆرە ناشیرینانەی پێیانەوە لکێنرابوو ڕەشدەبێتەوە و دەبێتە هێزێکی مرۆیی و مەعنەوی گەوورەش بۆیان، خۆ ئەگەر هۆشیان هاتەوە و لە کەڵکەڵەی غروری هاتنە خوارێ، ئەوا دەرگای ئاشتەوایی لەسەر پشت دەکرێتەوە و قۆناغی باوەڕ و متمانە دەستپێدەکات، کەوایە لە هەردوو لاوە کورد قازانج دەکات.
بۆیە کەس نابێت ڕملی خراپ لێبدات و بکەونە پەلەپرۆزێ و لە بێئاگاییان بە ئاوازی دوژمنانەوە هەڵپەڕ و داپەڕ بکەن.
