وەزارەتى نەوتى عێراق رۆژى سێشەممەى داهاتووى دیاریکرد بۆ کۆبوونەوە لەگەڵ کۆمپانیا نەوتییەکانى هەرێم.
وەزارەتەکە لە ڕاگەیەندراوێکدا بڵاویکردەوە، بانگێشتى ئاڕاستەى کۆمپانیا بیانییەکان کردووە کە لەژێر ناوى (ئەپیکۆر)دا کۆبوونەتەوە و گرێبەستیان لەگەڵ حکومەتى هەرێمى کوردستاندا هەیە بۆ پەرەپێدان بە کێڵگە نەوتییەکان.
روونیشیکردەوە، وەزارەت بانگێشتى ئاڕاستەى وەزارەتى سامانە سروشتییەکان لە هەرێم کردووە بۆ ئامادەبوون لە بەغداد رۆژى سێشەممەى داهاتوو بەمەبەستى هەڵسەنگاندن و گفتوگۆى پرسە پەیوەندیدارەکان بە گرێبەستەکان بۆ گەیشتنە لێکتێگەیشتنێک لە خزمەت پەرەپێدانى کێڵگە نەوتییەکان بە باشترین رێوشوێنە جیهانییەکان و بەجۆرێک ببێتەمایەى خزمەت بە بەرژەوەندییە نیشتمانییەکان.
ئەمە لەکاتێکدایە تا ئێستا هەناردەی نەوتی هەرێم لە ڕێگەی بەندەری جەیهانی تورکیاوە دەستی پێنەکردووەتەوە و هەوڵەکانیش تا ئێستا بەردەوامن بۆ دەستپێکردنەوەکە لە ڕێگەی کۆمپانیای سۆمۆوە.
