کۆمەڵەی پیشەسازیی نەوتی کوردستان “ئەپیکور” لە ڕاگەیەندراوێکدا پێشوازی لە هەوڵەکانی مارکۆ ڕوبیۆ، وەزیری دەرەوەی ئەمەریکا بۆ هەناردەکردنەوەی نەوتی کوردستان کرد.
ڕۆژی سێشەممە، مارکۆ ڕوبیۆ، وەزیری دەرەوەی ئەمریکا و محەمەد شیاع سوودانی، سەرۆک وەزیرانی عێراق لە پەیوەندییەکی تەلەفۆنیدا، دۆخی سووریا و ناوچەکە، گرووپە چەکدارەکان، هەناردەکردنەوەی نەوتی کوردستان و ژمارەیەک پرسی دیکەیان، تاوتوێ کرد.
بە گوێرەی ڕاگەیەنراوی وەزارەتی دەرەوەی ئەمریکا، لە پەیوەندییە تەلەفۆنییەکەدا، ڕوبیۆ ئاماژەی بەوە داوە، پێویستە لە زووترین کاتدا نەوت لە ڕێگەی بۆریی عێراق – تورکیا بۆ بەندەری جەیهان هەناردە بکرێتەوە و ڕێز لە مەرجی گرێبەستە نەوتییەکانی کۆمپانیا ئەمریکییەکان کە لە هەرێمی کوردستان و عێراق کاردەکەن بگیرێت.
بە پێی لێدوانەکانی پێشووی حەیان عەبدولغەنی، وەزیری نەوتی عێراق دەبوو لە ماوەی دوو هەفتەی ڕابردوودا دەست بە هەناردەکردنەوەی نەوتی هەرێمی کوردستان بکرێت، بەڵام تا ئێستا دەستیپێنەکردووەتەوە و وەزارەتەکەش ڕایدەگەیەنێت کە عێراق هەرێمی کوردستان ئامادەن و چاوەڕێ وەڵامی تورکیا دەکەن.
