سەرۆك وەزیرانی عێراق، بڕیاریدا بە كەمكردنەوەی نرخی بەشەخۆراكی مانگانە و هایپەرماركێتە حكومیەكان بۆ ئەو كەسانەی، كە مووچەی چاودێری كۆمەڵایەتی دەیانگرێتەوە.
نووسینگەی ڕاگەیاندنی سەرۆك وەزیرانی عێراق بڵاویكردەوە، بە پشتبەستن بە ئەولەویەتەكانی بەرنامەی حكومەت لە بەرەنگاربوونەوەی هەژاری و پاڵپشتیكردنی گرووپە لاوازەكان، محەمەد شیاع سودانی ڕێنمایی وەزارەتەكانی بازرگانی، كار و كاروباری كۆمەڵایەتی كرد، خزمەتگوزاری كەمكردنەوەی نرخ بۆ ئەو كەسانە دەستپێبكەن، كە تۆڕی پاراستنی كۆمەڵایەتی دەیانگرێتەوە و هاوكاری نەختینەیی وەردەگرن.
ڕاشیگەیاندووە، هەرزان كردنی نرخەكە لە یەكەم ڕۆژی مانگی پیرۆزی ڕەمەزانەوە دەستپێدەكات، بە ڕێژەیەك لە نێوان (10-15%)ی نرخی پاڵپشتیكراو و بۆ هەموو ئەو كەرەستانەی لە ناوەندەكانی هاوكاری (هایپەرماركێتەكان) دەفرۆشرێن، كە شەش لەو هایپەرماركێتانە لەلایەن سودانیەوە چەند ڕۆژێك لەمەوبەر لە بەغدا كرانەوە.
ئاماژە بەوەشكراوە، “سودانی هیوادارە كۆی گشتی هایپەرماركێتەكان بگاتە 150 شوێنی خۆراك و كاڵا بە نرخێكی پاڵپشتیكراو، ئەمەش لە چوارچێوەی ئاراستەكانی حكومەتدا دێت بۆ پاڵپشتیكردنی ئاسایشی خۆراك و كاڵاكان بۆ هاووڵاتیان”.
