سەرۆکی هەرێمی کوردستان رایگەیاند بەم نزیکانە دەست بە هەناردەکردنەوەی نەوت دەکرێت و ستایشی ڕۆڵی سەرۆک وەزیرانی عێراقیشی کرد بۆ چارەسەرکردنی پرسی مووچەی فەرمانبەران.
ئەمڕۆ چوارشەممە، نێچیرڤان بارزانی، سەرۆکی هەرێمی کوردستان ڕایگەیاند،محەمەد شیاع سوودانی، سەرۆک وەزیرانی عێراق ئەوەی پێیکراوە بۆ چارەسەرکردنی کێشەی مووچەی هەرێمی کوردستان کەمتەرخەمیی نەکردووە.
سەبارەت بە پرسی هەناردەکردنەوەی نەوتیش ڕایگەیاند،بەهۆی ڕاگرتنی نەوتی هەرێمەوە عێراق نزیکەی 20 ملیار دۆلار زیانی کردووە و وتیشی: تورکیا بەردەوام ئامادەیی بۆ هەناردەکردنەوەی نەوتی هەرێمی کوردستان دەربڕیوە و لە ماوەیەکی نزیکیشدا دەستی پێکردووەتەوە.
سەبارەت بە پێکهێنانی حکومەتی نوێی هەرێمی کوردستانیش، نێچیرڤان بارزانی ڕایگەیاند، بەرزیی ڕێژەی بەشداریکردنی هاووڵاتییان لە هەڵبژاردنەکەی پاردا جێگەی دەستخۆشی و سوپاسە و پێویستە پارتی و یەکێتی حکومەتێک دروستبکەن کە جێگەی هیوای خەڵکی هەرێمی کوردستان بێت.
ئەوەشی خستەڕوو لە خەڵکی هەرێمی کوردستان چاوەڕوانن حکومەت بەزووی پێکبهێنرێت و حکومەتەکەش لەلایەن پارتی و یەکێتییەوە پێکدەهێنرێت.
هاوکات ڕەخنەشی لە شێوازی حکومڕانی عێراق گرت و ڕایگەیاند، گەورەترین کێشەمان ئەوەیە، ئەو سیستمەی لە عێراقدا هەیە هەموو شتێکە بەس فیدراڵی نییە و وتیشی: “لە هیچ دنیایەکی فیدراڵیدا ئەو مەرکەزیەتە نییە کە لە عێراقدا هەیە”.
